हॅलो महाराष्ट्र ऑनलाईन । महाविकास आघाडी सरकारवर भाजपकडून वारंवार हल्लाबोल केला जात आहे. धुळे येथे भाजप आमदार आशिष शेलार यांनी महाविकास आघाडी सरकारवर हल्लाबोल केला आहे. “राज्यातील आघाडी सरकार शेतकऱ्यांचे रक्षणकर्ते नसून अनेक घोटाळेबाज धर्मभास्कर वाघांचे आश्रयदाते आहेत, अशा शब्दात शेलार यांनी निशाणा साधला आहे.
भाजपची धुळे या ठिकाणी संघटनात्मक बैठक आज पार पडली. यावेळी बैठकीस भाजपचे आमदार आशिष शेलार यांनी उपस्थिती लावली होती. यावेळी शेलार म्हणाले, “धुळे जिल्हा परिषदेतील कोट्यावधींच्या अपहार प्रकरणाचा मुख्य सुत्रधार धर्मभास्करचे बाप निघावेत असे एक घोटाळेबाज चेहरे ठाकरे सरकारच्या काळात उघड होत आहेत. बार, पब, डिस्को, लेडीज बार आणि काळे धंदे राजरोस पणे सुरु आहेत.”
आघाडी सरकारवर टीका करताना आमदार शेलार यांनी म्हंटले आहे की, या आघाडी सरकारची प्रशासकीय यंत्रणा पूर्णपणे कोलमडली आहे. अनेक आएएस दर्जाचे वरिष्ठ अधिकारी अनेक दिवस नियुक्तीच्या प्रतिक्षेत आहेत, तर सतत बदल्या करुन अधिकाऱ्यांचे मनोबल खच्चीकरण करण्यात आले आहे. तीन कारभारी आणि रोज बदला अधिकारी अशी स्थिती राज्यात आघाडी सरकारची पहायला मिळते आहे.