नाशिक प्रतिनिधी | भिकन शेख
बोहल्यावर चढण्यापूर्वीच एका उच्च शिक्षित तरुणाने आत्महत्या करून जीवन संपविले. हळदीच्या दिवशीच हा प्रकार समोर आल्याने सर्वत्र हळहळ व्यक्त करण्यात येते आहे. पंचवटीतील हिरावाडी रोडवर रेशीमबंध कार्यालयामागे राहणाऱ्या तरुणाने गंगापूररोडवरील बळवंतनगर भागात आत्महत्या करीत जीवन संपविले.
निखिल प्रकाश देशमुख (वय ३० रा. हरिकृपा रो-हाऊस, पंचवटी) असे आत्महत्या करणाऱ्या तरुणाचे नाव आहे. या प्रकरणी गंगापूर पोलिस ठाण्यात आकस्मात मृत्यूची नोंद करण्यात आली. निखिलने गुरुवारी मध्यरात्री दीड वाजेच्या सुमारास गंगापूररोडवरील बळवंतनगर येथील फ्लॅटमध्ये गळफास घेतला.
पहाटेच्या सुमारास निखिलच्या आत्महत्येची घटना उघडकीस आली. हा प्रकार समजताच गंगापूर पोलिसांनी निखिलच्या फ्लॅटकडे धाव घेतली. पंचनामा करून मृतदेह उत्तरीय तपासणीसाठी सिव्हिल हॉस्पिटलमध्ये पाठविण्यात आला. घटनास्थळावर पोलिसांना एक सुसाइड नोट सापडली असून त्यात स्वत: जीवन संपवित असल्याचा उल्लेख आहे. घटनेचा अधिक तपास हवालदार गोपाळ पाटील करीत आहेत.
निखिलचा आज, शनिवारी (दि.२०) विवाह होता. त्यामुळे देशमुख कुटुंबात शुक्रवारी (दि.१९) हळदी समारंभाची तयारी सुरू होती. निखिलच्या आत्महत्येची बातमी समोर आली अन् आनंदाचा सोहळा दु:खात बुडाला. निखिलच्या आत्महत्येचे कारण समोर आलेले नसल्याने पोलिसांनी तपास सुरू केला आहे. उच्च शिक्षित असलेल्या निखिलने बोहल्यावर चढण्यापूर्वीच आत्महत्येचा टोकाचा निर्णय घेतल्याने सर्वत्र हळहळ व्यक्त केली जाते आहे.