हॅलो महाराष्ट्र ऑनलाइन | गडचिरोली जिल्ह्यात कार आणि ट्रॅक्टर मध्ये भीषण अपघात झाला असून यामध्ये भाजपाचे जिल्हा सचिव तथा ‘मन की बात’ कार्यक्रमाचे जिल्हा संयोजक आनंद गण्यारपवार यांचा जागीच मृत्यू झाला. सकाळी साडेसहा वाजता हा अपघात झाला आहे. अपघात एवढा भीषण होता की यात ट्रॅक्टरचे 2 तुकडे झाले.
अतुल गण्यारपवार व आनंद गण्यारपवार हे चामोर्शी येथून ब्रम्हपुरीमार्गे चारचाकी वाहनाने नागपूरला जात होते. दरम्यान रणमोचन फाट्याजवळ समोरून येणाऱ्या ट्रॅक्टरने कारला जोरदार धडक दिली. यात कारमध्ये मागे बसलेले आनंद गण्यारपवार हे जागीच ठार झाले, तर अतुल गण्यारपवार व चालक हे एअरबॅगमुळे बचावले
या घटनेनंतर तिघांनाही ब्रम्हपुरी येथे नेण्यात आले. अतुल गण्यारपावार यांच्या मानेला दुखापत झाली असून, प्रकृती स्थिर आहे. दरम्यान खासदार अशोक नेते यांनी रूग्णालयात जात घटनेची माहिती घेतली. आनंद गण्यारपवार यांच्या निधनामुळे चामोर्शीमध्ये शोककळा पसरली आहे