हॅलो महाराष्ट्र ऑनलाईन । सध्या महाराष्ट्रात भाजप आणि महाविकास आघाडीतील नेत्यांमध्ये टीकाटिप्पणी केली जात आहे. मोदींच्या पुण्याईमुळे चंद्रकांत पाटील कोल्हापूर आणि पुण्यातून निवडून येतात अशी टीका नुकतीच राष्ट्रवादी काँग्रेसचे नेते छगन भुजबळ यांनी केली. त्यावर पाटील यांनी उत्तर दिले असून “आयुष्याची २० ते ३३ वर्षे मी संघटनेसाठी दिली. मी देशभरात प्रवास केला आहे. त्यामुळे भुजबळांनी मला शिकवू नये, त्यांना काय माहिती आहे? उगाच टिमकी वाजवायची नाही,” असे पाटील यांनी पलटवार केला आहे.
भाजप प्रदेशाध्यक्ष चंद्रकांत पाटील यांनी काल मुंबईची ग्रामदैवत मुंबादेवीला जाऊन मोदींच्या दीर्घायुष्यासाठी प्रार्थना केली. यावेळी त्यांनी माध्यमांशी संवाद साधला. यावेळी ते म्हणाले की, “भाजपा युवा मोर्चाच्या बैठकीत बोलताना मी कोणतीही परंपरा नसताना आयुष्यात मोठे व्हायचे आहे. उद्धव ठाकरेंना बाळासाहेबांची पुण्याई होती त्यामुळे आयते मिळाले, तसेच तुम्हाला मिळणार नाही. तुम्हाला परिश्रम करावे लागतील असा संदर्भ होता. आता तेवढेच एक वाक्य काढून बोलायचे असेल तर ठीक आहे”.
माझ्या राजकीय प्रवाशाबद्दल सांगायचे झाले तर माझे वडील ना सरपंच होते ना ग्रामपंचायत सदस्य होते. भुजबळांना काय माहिती आहे? आयुष्यातील ऐन तरुणाईतील १३ वर्ष मी संघटनेसाठी घर सोडले होते. भुजबळ मला माझी टीमकी वाजवण्याची सवय नाही. आम्ही एका वाडीत राहत असल्याने त्यांना ओळखतो. भुजबळांचा जो पालिकेचा वॉर्ड आहे तिथे आजही माझे घर आहे. आयुष्याची २० ते ३३ वर्षे मी संघटनेसाठी दिली. मी देशभरात प्रवास केला आहे. त्यामुळे भुजबळांनी मला शिकवू नये,” असे पाटील यांनी म्हंटले आहे.