सातारा प्रतिनिधी शुभम बोडके
जिल्ह्यात मागील काही दिवसांपासून तापमानाचा पारा घसरू लागला असल्याने थंडीचा कडाका चांगलाच वाढला आहे. डिसेंबर महिन्यात झालेल्या हवामान बदलामुळे आलेल्या अवकाळी पावसाचे सावट सध्यातरी हटले आहे. दररोज हवामानात बदल होऊ लागले आहेत. त्यामुळे दिवसभर कडक ऊन आणि रात्री गारठा पडू लागला आहे. सायंकाळी तापमानाचा पारा घसरत असून पहाटे धुक्यांची रस्त्यावर गर्दी केल्याने नागरिकांना थंडीचा सामना करावा लागत आहे.
वाढत्या थंडी आणि धुक्यांचा सामना मॉर्निंग वॅकला जाणाऱ्या जेष्ठ नागरिकांना दूध विक्रेत्यांना, औद्योगिक वसाहतीमधील कर्मचाऱ्यांना करावा लागत आहे.. या धुक्यामुळे ज्वारी सह, भाजीपाला, फळ फळबागांना पिकांना मात्र मोठा फटका बसणार आहे. सातारा जिल्ह्यातील कराड, पाटण, सातारा, वाई, जावली, महाबळेश्वर, खंडाळा, फलटणसह माण, खटावलाही धुक्याची झालर पसरलेली होती.
महाबळेश्वरला तापमानाचा पारा सकाळी 10 वाजता 15 अंशावर होता. पर्यटकांनी शनिवार व रविवार सुट्ट्यामुळे गर्दी केलेली आहे. हवामानात थंडीचा कडाका वाढल्याने पर्यटक रूमबाहेर पडता दिसत नाहीत. महाबळेश्वर व पाचगणी येथे थंडीचा कडाका चांगलाच वाढला आहे. त्यामुळे दुपारनंतर थंडी कमी झाल्यानंतर पर्यटक महाबळेश्वर, पाचगणी येथील पाॅंईटसवर भेटी देत आहेत.