जालना : पुतण्याला पाण्यात बुडताना पाहून चुलत्याने ही पाण्यात उडी घेतली. मात्र यावेळी दोघांनाही जीव गमवावा लागला. ही घटना जालना तालुक्यातील घाणेवाडी गावात मंगळवारी दुपारी साडेतीन वाजेच्या सुमारास घडली. परमेश्वर भानुदास खंडागळे, वय – 50, रोहित कृष्णा खंडागळे वय – 18 (दोघेही राहणार मांडवा) अशी मृतांची नावे आहेत.
हाती आलेल्या माहितीनूसार, नेहमीप्रमाणे घाणेवाडी तलावाच्या मांडवा कडील बाजूने रोहित खंडागळे हा गुरे चरण्यासाठी गेला होता. पावसामुळे सध्या तलावात भरपूर प्रमाणात पाणी आहे. तलावाच्या बाजूने गुरे चरत असताना रोहितचा पाय घसरून तो पाण्यात पडला. त्याचसोबत असणाऱ्या मुलाने आरडाओरड केली असता शेतात काम करत असणाऱ्या परमेश्वर खंडागळे यांनी धाव घेतली.
पुतण्याला वाचवण्यासाठी त्यांनी पाण्यात उडी घेतली. मात्र घाबरलेल्या रोहितने परमेश्वर यांच्या गळ्याला मिठी मारली त्यामुळे दोघेही पाण्यात बुडालेल्या नेत्यांचा अंत झाला. या घटनेची माहिती मिळताच गावकऱ्यांनी धाव घेतली. त्या दोघांना बाहेर काढून तातडीने रूग्णालयात दाखल केले. मात्र डॉक्टरांनी तपासून त्यांना मृत घोषित केले. या घटनेबद्दल गावकऱ्यांमध्ये हळहळ व्यक्त होत आहे.