नवी दिल्ली | सायबर गुन्हेगारांनी सरकारी मालकीची तेल कंपनी ऑइल इंडिया लिमिटेड (OIL) ला टार्गेट केले आहे. आसाममधील कंपनीच्या मुख्यालयावर सायबर हल्ल्यानंतर खंडणी म्हणून मोठ्या रकमेची मागणी करण्यात आली आहे.
सायबर हल्लेखोरांनी व्हायरस पाठवून कंपनीची सिस्टीम आणि कॉम्प्युटर ताब्यात घेतले आणि ते सोडण्यासाठी 75 लाख डॉलर्स (सुमारे 57 कोटी रुपये) मागितले. सायबर गुन्हेगारांनी ही रक्कम बिटकॉईनच्या रूपात देण्याची अट घातली. कंपनीने सांगितले की, जरी हा हल्ला 10 एप्रिल रोजी जियोलॉजिकल अँड रिझरवायर डिपार्टमेंटवर करण्यात आला होता, मात्र आयटी विभागाने मंगळवारी त्याची माहिती दिली.
कंपनी आणि सरकारच्या तिजोरीचे मोठे नुकसान
OIL चे व्यवस्थापक (सुरक्षा) सचिन कुमार यांनी याप्रकरणी दाखल केलेल्या पोलिस तक्रारीत म्हटले आहे की, रॅन्समवेअर आणि सायबर हल्ल्यांमुळे कंपनी आणि सरकारी तिजोरीचे मोठे नुकसान झाले आहे. IE सिस्टीमवर झालेल्या व्हायरसच्या हल्ल्यामुळे व्यवसायाला मोठा फटका बसला आणि तो सुरळीत व्हायलाही बराच वेळ लागला.
मात्र, कंपनीच्या प्रवक्त्याने सांगितले की, सायबर हल्ल्यानंतर ड्रिलिंग आणि उत्पादनाचे काम चांगले सुरू आहे, तर आयटीशी संबंधित काम, ज्यामध्ये ट्रान्सझॅक्शन आणि डेटा कलेक्शन यासारख्या महत्त्वाच्या कामांचा समावेश आहे, ते प्रभावित झाले. जियोलॉजिकल अँड रिझरवायर डिपार्टमेंटवर चार दिवसांपूर्वी हल्ला करण्यात आला होता.
नेटवर्क समस्या कंपनी
सचिन कुमार म्हणाले की,” सायबर हल्ल्यानंतर प्राथमिक तपासात असे आढळून आले की, यामुळे कंपनीचे नेटवर्क, सर्व्हर आणि क्लायंटचे कॉम्प्युटरही खराब झाले आहेत. ते पुन्हा दुरुस्त केला जात आहे. या प्रकरणी आसाममधील दुलियाजान पोलीस ठाण्यात तक्रार करण्यात आली असून पोलीस त्याचाही तपास करत आहेत.”
डेटाचे नुकसान नाही
कंपनीचे प्रवक्ते त्रिदिव हजारिका यांनी सांगितले की, सायबर हल्ल्यामुळे कंपनीच्या डेटावर कोणताही परिणाम झालेला नाही. खबरदारी म्हणून, आम्ही आमच्या सर्व सिस्टीम ताबडतोब बंद केल्या आणि डेटा सुरक्षित करण्याचे काम सुरू केले. 1889 मध्ये स्थापन झालेली OIL ही देशातील दुसरी सर्वात मोठी ऑइल अँड गॅस कंपनी आहे.