हॅलो महाराष्ट्र ऑनलाईन । दिल्ली विमानतळाने एक मोठी ऐतिहासिक कामगिरी केली आहे. थाई एअरएशिया एक्सने दिल्ली आणि बँकॉक-डॉन मुआंग (डीएमके) यांच्यात थेट विमानसेवा सुरू केली असून, यामुळे दिल्लीचे इंदिरा गांधी विमानतळ जगभरातील 150 स्थळांना जोडणारे भारतातील पहिले विमानतळ ठरले आहे. या महत्त्वपूर्ण कामगिरीचा ठराव 12 डिसेंबर रोजी थेट उड्डाणांच्या उद्घाटनाच्या वेळी झाला . सध्या हे उड्डाण आठवड्यात दोन वेळा एअरबस A330 विमानांसह चालवले जात आहे. तसेच 2025 च्या जानेवारी मध्यापर्यंत हे उड्डाण आठवड्यात चार वेळा होण्याचा अंदाज वर्तवला जात आहे.
दिल्ली इंटरनॅशनल एअरपोर्ट लिमिटेड –
थाई एअरएशिया एक्सची ही नवीन सेवा एअरबस ए330 विमानांच्या सहाय्याने आठवड्यातून दोन वेळा चालवली जाणार आहे . जानेवारी 2025 पर्यंत या सेवेला आठवड्यातून चार वेळा चालवण्याची योजना आहे. दिल्ली इंटरनॅशनल एअरपोर्ट लिमिटेडने (DIAL) सांगितले की, मागील काही वर्षांत दिल्ली विमानतळाने नोम पेन्ह, बाली डेनपसार, कॅलगरी, मॉन्ट्रियल, वॅंकूव्हर, वॉशिंग्टन डलेस, शिकागो ओहारे, आणि टोकियो हनेडा यांसारख्या 20 हून अधिक खास आंतरराष्ट्रीय स्थळांना जोडले आहे. तसेच गेल्या दहा वर्षांत दिल्ली विमानतळाने ट्रान्स्फर प्रवाशांमध्ये 100% वाढ नोंदवली आहे. त्यामुळे हा दक्षिण आशियातील एक महत्त्वाचा ट्रान्झिट हब बनला आहे.
56% उड्डाणे दिल्लीहून –
भारताच्या 88% लांब पल्ल्याच्या ठिकाणांशी दिल्ली विमानतळ जोडलेले आहे. भारतातून होणाऱ्या सर्व लांब पल्ल्याच्या साप्ताहिक उड्डाणांपैकी 56% उड्डाणे दिल्लीहून होतात. भारतातून लांब पल्ल्याच्या प्रवासासाठी जाणाऱ्या जवळपास 50% प्रवासी दिल्ली विमानतळाचा प्रवेशद्वार पर्याय निवडतात. तसेच दरवर्षी सुमारे 40 लाख देशांतर्गत प्रवाशांना आंतरराष्ट्रीय स्थळांना सहज कनेक्शन मिळवून देणारे दिल्ली विमानतळ भारतीय विमान कंपन्यांच्या वाइड-बॉडी विमानांच्या वाढत्या सेवांमुळे एक सुपर-कनेक्टर हब होण्यासाठी सज्ज आहे.
प्रवाशांसाठी पसंतीचे केंद्र बनण्याचा निर्धार –
दिल्ली इंटरनॅशनल एअरपोर्ट लिमिटेडचे सीईओ विदेह कुमार जयपुरियार म्हणाले कि ,150 स्थानकांशी जोडले जाणे ही आमच्या जागतिक कनेक्टिव्हिटी सुधारण्यासाठीच्या वचनबद्धतेचे इंडिकेटर आहे. आम्हाला भारताला विमाननाच्या एका नव्या युगात घेऊन जाण्याचा अभिमान आहे आणि जागतिक प्रवाशांसाठी पसंतीचे केंद्र बनण्याचा आमचा निर्धार आहे. दिल्ली विमानतळाची अत्याधुनिक सुविधा, प्रवासी-केंद्रित सेवासुविधा आणि प्रभावी ट्रान्स्फर प्रक्रिया यामुळे तो विमानन क्षेत्रातील गुणवत्ता सिद्ध करणारा मानदंड ठरला आहे.