डोंबिवली : हॅलो महाराष्ट्र – ठाणे जिल्ह्यातील डोंबिवली शहरात एक लज्जास्पद घटना उघडकीस आली आहे. यामध्ये डोंबिवली शहरातील एका रुग्णालयात 75 वर्षीय महिलेचा विनयभंग करण्यात आला आहे. हॉस्पिटलमध्ये उपचार सुरु असताना वॉर्डबॉयने तिचा विनयभंग केला आहे. या वृद्ध महिलेचा विनयभंग केल्या प्रकरणी आरोपी वॉर्डबॉयला रामनगर पोलिसांनी अटक केली आहे. कानादास वैष्णव असे या आरोपी वॉर्डबॉयचे नाव आहे. डोंबिवलीतील स्पर्श हॉस्पिटलमध्ये हा धक्कादायक प्रकार घडला आहे. त्यामुळे संपूर्ण परिसरात एकच खळबळ माजली आहे.
काय आहे नेमके प्रकरण ?
डोंबिवली पूर्वेतील नामांकित स्पर्श हॉस्पिटलमध्ये एक महिला उपचारासाठी दाखल झाली होती. उपचारादरम्यान या 75 वर्षीय वयोवृद्ध महिलेसोबत गैरवर्तन करण्यात आले. दिनांक 16 ते 19 फेब्रुवारी या दरम्यान या महिलेचा दोनदा विनयभंग करण्यात आल्याचा आरोप करण्यात आला आहे.
एक्स-रे काढताना विनयभंग
या हॉस्पिटलमध्ये काम करणाऱ्या वॉर्डबॉयने हे लज्जास्पद कृत्य केले आहे. ही वयोवृद्ध महिला एक्स-रे करण्यासाठी रूममध्ये गेली असता त्या ठिकाणी तिचा विनयभंग करण्यात आला. एकदा हा प्रकार घडल्याने महिलेला वाटले चुकून हा प्रकार घडला असेल मात्र या नराधम वॉर्डबॉयने दुसऱ्यांदा असाच प्रकार केला. यानंतर पीडित महिलेने हि गोष्ट आपल्या मुलीला सांगितली. उपचारानंतर पीडित महिलेच्या मुलीच्या तक्रारीवरुन रामनगर पोलीस ठाण्यात आरोपी वॉर्डबॉय विरुद्ध गुन्हा दाखल करण्यात आला. रामनगर पोलीस स्टेशनचे वरिष्ठ पोलीस निरीक्षक सचिन सांडभोर यांच्या मार्गदर्शनाखाली पोलीस अधिकारी केशव हसगूले हे या प्रकरणाचा पुढील तपास करत आहेत.