नातेवाईकांच्या साखरपुड्याला जात असताना बाईक अपघातात बापलेकाचा दुर्दैवी मृत्यू

धुळे : हॅलो महाराष्ट्र – धुळ्यामध्ये एक धक्कादायक घटना घडली आहे. यामध्ये नातेवाईकांच्या साखरपुड्यासाठी जाताना बाईक अपघातात पिता पुत्राचा मृत्यू झाला आहे. धुळ्यातील भडणे फाट्याजवळ हा भीषण अपघात घडला आहे. यामध्ये वडील आपल्या लहान मुलाला सोबत घेऊन आपल्या नातेवाईकांच्या साखरपुड्यासाठी जात होते. यादरम्यान अज्ञात वाहनासोबत त्यांच्या बाईकची धडक झाली. यामध्ये वडिलांचा जागीच मृत्यू झाला तर गंभीर जखमी झालेल्या लहान मुलाने उपचारादरम्यान प्राण सोडले.

नातेवाईकांच्या साखरपुड्याला जाताना अपघात
धुळे जिल्ह्यातील शिंदखेडा तालुक्यातील विखरण या गावातील विनोद राजपूत हे सुरत येथे कामानिमित्त वास्तव्यास होते. दोन दिवसांपूर्वीच नातेवाईकाच्या साखरपुड्यासाठी सुरत येथून मुलगा कृष्णासोबत आपल्या गावी आले होते.

पित्याचा जागीच मृत्यू, तर मुलाचा उपचारादरम्यान
घटनेच्या दिवशी विनोद राजपूत हे आपल्या मुलासोबत नातेवाईकाच्या साखरपुड्याला जात असताना त्यांच्या मोटरसायकलचा अपघात झाला. यात विनोद राजपूत यांचा जागीच मृत्यू झाला, तर मुलगा गंभीर जखमी झाला. यानंतर नागरिकांनी घटनास्थळी धाव घेऊन मुलगा कृष्णाला रुग्णालयात दाखल केले. मात्र उपचारादरम्यानच या मुलाने आपला दम तोडला.

डंपर चालकाला अटक
हा अपघात इतका भीषण होता की विनोद राजपूत यांचे मुंडके आणि धड वेगवेगळे झाले. या घटनेची माहिती मिळताच शिंदखेडा पोलीस तातडीने घटनास्थळी दाखल झाले आणि त्यांनी राजपूत यांच्या बाईकला धडक देणाऱ्या वाळू वाहतूक करणाऱ्या डंपर चालकाला ताब्यात घेतले. शिंदखेडा पोलीस या घटनेचा पुढील तपास करत आहेत.