पुणेकरांना उन्हाचा जबरदस्त तडाखा बसत असून एप्रिलच्या दुसऱ्याच आठवड्यात तापमानाने चाळीशीचा टप्पा पार केला आहे. लोहगाव आणि शिवाजीनगरमध्ये यंदाच्या हंगामातील सर्वाधिक तापमानाची नोंद झाली असून, ऐतिहासिक उच्चांकी तापमानांच्या जवळ पोहोचल्याचे हवामान विभागाने स्पष्ट केले आहे.
मंगळवारी लोहगावमध्ये तब्बल ४२.७ अंश सेल्सियस तापमानाची नोंद झाली, तर शिवाजीनगरमध्ये ४१.३ अंश सेल्सियस तापमान नोंदले गेले. ही यंदाच्या उन्हाळ्यातील आतापर्यंतची सर्वाधिक नोंद आहे. शहरातील इतर भागांमध्येही तापमान चाळीशीच्या आसपास पोहोचले होते:
- कोरेगाव पार्क: ४१.४°C
- हडपसर: ४०.७°C
- पाषाण: ४०.६°C
- चिंचवड: ४०.३°C
- मगरपट्टा: ३९.६°C
- एनडीए: ३९°C
उष्णतेमागचे कारण
हवामान विभागाचे शास्त्रज्ञ एस. डी. सानप यांनी सांगितले की, सध्या कोणतीही हवामान प्रणाली सक्रिय नाही. आकाश निरभ्र असून हवेतील आर्द्रता कमी झाल्यामुळे सूर्यकिरणे सरळ जमिनीवर पडत आहेत. त्यामुळे तापमानात कमालीची वाढ झाली आहे. रात्री देखील उकाडा जाणवतोय आणि यामागे शहरीकरणाचे परिणामही कारणीभूत आहेत.
थोडा दिलासा मिळणार?
अद्याप दोन दिवस उष्णतेचा प्रभाव कायम राहण्याची शक्यता असून त्यानंतर तापमानात किंचित घट होण्याचा अंदाज वर्तवण्यात आला आहे.
इतिहासात डोकावल्यास
शिवाजीनगर येथे १८९७ मध्ये ४३.३ अंश सेल्सियस ही एप्रिलमधील आजवरची सर्वाधिक नोंद झाली होती.
त्याखालोखाल:
- १९५८: ४३.२°C
- २०१९ (२९ एप्रिल): ४३°C
- २०१९ (२८ एप्रिल): ४२.९°C
पुण्यात सध्या असणारा उकाडा इतिहासाची आठवण करून देतो आहे. नागरिकांनी स्वतःची काळजी घ्यावी, भरपूर पाणी प्यावे आणि गरज नसताना उन्हात बाहेर जाणे टाळावे, असे आवाहन करण्यात येत आहे.
