औरंगाबाद – शेतातील लिंबाच्या झाडाला पती-पत्नीने गळफास घेऊन आत्महत्या केल्याची घटना आज सकाळी हिंगोली जिल्ह्यातील सेनगाव तालुक्यातील दाताडा बुद्रुक शिवारात उघकीस आली आहे. रामदास (25) आणि शीतल इंगळे (20) अशी मृतांची नावे असून ते वाघजाळी येथील रहिवासी होते. या घटनेमुळे परिसरात हळहळ व्यक्त केली जात आहे.
याविषयी अधिक माहिती अशी की, वाघजाळी येथे रामदास आपली पत्नी शीतल आणि आईसह शेतात राहत असे. दोघांनी आत्महत्या केली की हा घातपाताचा प्रकार आहे, हे सांगणे शक्य नसल्याचे घटनास्थळी पोहचलेल्या पोलीस अधिकाऱ्यांनी सांगितले. दोघांच्या मृत्यूची वार्ता गावात पसरताच ग्रामस्थांनी शेतात गर्दी केली होती.
शेवटचे वृत्त हाती येईपर्यंत या प्रकरणी पोलिसात कुठलीही नोंद झाली नाही. पोलीस घटनास्थळाची पाहणी करत असून पुढील तपास सुरु आहेत. पोलीस तपासाअंतीच घटनेमागील खरे कारण पुढे येणार आहे.