नवी दिल्ली । NSE IFSC ला निवडक अमेरिकन शेअर्समध्ये ट्रेडिंग सुरू करण्याची परवानगी मिळाली आहे. NSE IFSC हे खरेतर NSE चे इंटरनॅशनल एक्सचेंज आहे. ही NSE ची पूर्ण मालकीची उपकंपनी आहे. गेल्या वर्षी ऑगस्टमध्ये, NSE इंटरनॅशनल एक्स्चेंजने जाहीर केले की निवडक यूएस स्टॉक्समध्ये ट्रेडिंग करणे NSE IFSC प्लॅटफॉर्मद्वारे सुलभ केले जाईल. या प्लॅटफॉर्मद्वारे गुंतवणूकदार अमेरिकन स्टॉक खरेदी करू शकतील आणि शेअर्सच्या डिपॉझिटरी रिसीट देऊ शकतील.
या प्लॅटफॉर्मवर 50 स्टॉकच्या रिसीट खरेदी करण्यास परवानगी देण्यात आली आहे. यापैकी आठ 3 मार्चपासून ट्रेडिंगसाठी उपलब्ध होतील. या स्टॉकमध्ये Alphabet Inc (Google), Amazon Inc, Tesla Inc, Meta Platforms (Facebook), Microsoft corporation, Netflix, Apple आणि Walmart यांच्या नावांचा समावेश आहे. हे सर्व अमेरिकेचे मोठे आणि प्रसिद्ध स्टॉक्स आहेत.
बाकी स्टॉक्सचे काय?
उर्वरित स्टॉक्समध्ये ट्रेडिंग सुरू होण्याची तारीख वेगळ्या परिपत्रकाद्वारे सूचित केली जाईल. या प्लॅटफॉर्मवर यूएस स्टॉकची ट्रेडिंग, क्लिअरिंग, सेटलमेंट आणि होल्डिंगची संपूर्ण प्रक्रिया IFSC अथॉरिटीच्या रेग्युलेशन फ्रेमवर्क अंतर्गत पूर्ण केली जाईल.
भारतीय रिटेल गुंतवणूकदार NSE IFSC च्या प्लॅटफॉर्मद्वारे लिबरलाइज्ड रेमिटन्स स्कीम (LRS) मर्यादेअंतर्गत ट्रेडिंग करण्यास सक्षम असतील. LRS ची तरतूद RBI ने केली आहे. NSE IFSC नुसार, या प्लॅटफॉर्मद्वारे आंतरराष्ट्रीय गुंतवणूक खूप सोपी होईल आणि त्याची किंमत जास्त नसेल. गुंतवणूकदारांना या प्लॅटफॉर्मवर अंशात्मक प्रमाणात गुंतवणूक करण्याची सुविधा देखील असेल.