भारत आणि पाकिस्तानमधील वाढत्या तणावाच्या पार्श्वभूमीवर देशातील प्रमुख विमान कंपन्यांनी आपल्या प्रवाशांसाठी ट्रॅव्हल अॅडव्हायजरी जारी केली आहे. इंडिगो (IndiGo), अकासा एअर (Akasa Air) आणि एअर इंडिया (Air India) या कंपन्यांनी गुरुवारी सूचना करत प्रवाशांना विमानतळावर येण्यापूर्वी त्यांच्या फ्लाइट स्टेटसची खात्री करण्याचा सल्ला दिला आहे.
इंडिगोकडून विलंब आणि रद्दबातलतेचा इशारा
इंडिगोकडून सांगण्यात आलं की, “अनपेक्षित ऑपरेशनल कारणांमुळे” काही उड्डाणांमध्ये विलंब आणि रद्दबातलतेची शक्यता आहे. प्रवाशांनी प्रवास करण्यापूर्वी वेबसाइट किंवा ग्राहकसेवा केंद्रावरून अपडेट घ्याव्यात, असे आवाहन कंपनीने केलं आहे.
अकासा एअरची महत्त्वाची सूचना
अकासा एअरने सुरक्षा उपाय वाढवण्यात आल्यामुळे प्रवाशांनी उड्डाणाच्या किमान 3 तास आधी विमानतळावर उपस्थित राहावे, असे स्पष्ट केले आहे.
त्यांनी पुढे म्हटले की,
वैध सरकारी ओळखपत्र सोबत असणे आवश्यक आहे.
चेक-इन बॅगेजशिवाय फक्त एक 7 किलोपर्यंतचा हँडबॅग नेण्याची परवानगी असेल.
सर्व प्रवाशांची दुय्यम सुरक्षा तपासणी केली जाईल.
वेळ वाचवण्यासाठी ऑनलाइन चेक-इन करण्याची विनंती करण्यात आली आहे.
एअर इंडियाकडूनही पुष्टी
एअर इंडियानेही त्यांच्या काही देशांतर्गत उड्डाणांमध्ये उशीर होत असल्याची पुष्टी केली आहे. त्यांनी या असुविधेबद्दल दिलगिरी व्यक्त करत, परिणाम कमी करण्यासाठी प्रयत्न सुरु असल्याचे सांगितले.
स्पाईसजेटचीही तयारी
स्पाईसजेटनेही आपली ट्रॅव्हल अॅडव्हायजरी जारी करत, प्रवाशांना कमीत कमी 3 तास आधी विमानतळावर पोहोचण्याचा सल्ला दिला आहे.
सूचना प्रवाशांसाठी सूचना
- फ्लाइट स्टेटस विमानतळावर निघण्यापूर्वी नक्की तपासा.
- अधिक वेळ हातात ठेवा, पर्यायी प्रवास योजनाही तयार ठेवा.
- ऑनलाईन चेक-इनचा पर्याय वापरा.
