नवी दिल्ली/काबूल । 20 वर्षांनंतर अफगाणिस्तानातील सर्व अमेरिकन सैन्याने माघार घेतल्यानंतर जगाची चिंता वाढली आहे. दरम्यान, अफगाणिस्तानच्या राष्ट्रीय सुरक्षा संचालनालयाच्या टॉपच्या सूत्रांनी धक्कादायक माहिती दिली आहे, जी भारतासाठी मोठ्या चिंतेचे कारण बनू शकते. NDS च्या एका टॉपच्या सूत्राच्या मते, पाकिस्तानची गुप्तचर संस्था इंटर सर्व्हिसेस इंटेलिजन्स (ISI) भारताकडून शस्त्रास्त्र आणि दारूगोळ्याच्या पुरवठा साखळीच्या तपशीलांची चौकशी करत आहे.
एका न्यूज चॅनेलशी केलेल्या विशेष संभाषणात, NDS च्या टॉपच्या सूत्रांनी हे उघड केले की, हे सर्व NDS अधिकारी, अफगाण सैनिक ISI आणि तालिबानच्या रडारवर आहेत. पाकिस्तानी गुप्तचर संस्था ISI वर दहशतवादी संघटनांना निधी पुरवण्याचा, पाकिस्तानात दहशतवाद्यांना आश्रय देण्याचे आणि प्रशिक्षण देण्याचा आरोप आहे.
एका न्यूज चॅनेलशी केलेल्या विशेष संभाषणात, NDS च्या टॉपच्या सूत्रांनी असेही सांगितले की,” तालिबानची सामान्य जनतेसाठी माफी केवळ जगाच्या डोळ्यात धूळ फेकण्यासाठी आहे.” सूत्रांनी पुढे सांगितले की,” ISI हे NDS अधिकाऱ्यांवर नजर ठेवून आहे. त्यांना हे जाणून घ्यायचे आहे की, हे अधिकारी भारतातून शस्त्रास्त्रे आणि दारूगोळा मागवत होते कि नाही.”
दरम्यान, नाव न छापण्याच्या अटीवर, एक उच्च अधिकारी म्हणाला, “ही धमकी फक्त भारत किंवा इंडियन मिलिटरी अकादमीसाठी नाही. ते IMA मध्ये प्रशिक्षित अधिकाऱ्यांकडे देखील संशयाने पाहतात. कारण भारत अफगाणिस्तानातील लोकशाहीचे समर्थन करत होता. आमचे तेथे कधीच कोणतेही निहित स्वार्थ नव्हते, परंतु सर्व NDS अधिकारी ISI आणि तालिबानच्या धोक्यात आहेत. यातील काही अधिकारी आमच्याशी संपर्क साधण्याचा प्रयत्न करत आहेत. जेव्हाही आम्ही ठरवू, आम्ही त्यांना भारताचा व्हिसा देऊ.”
15 ऑगस्ट रोजी तालिबान्यांनी अफगाणिस्तानची राजधानी काबूलवर कब्जा केला, तेव्हा रस्त्यावर चौक्या लावण्यात आल्या आणि राज्य गुप्तचर संस्था राष्ट्रीय सुरक्षा संचालनालयाच्या (NDS) सदस्यांना शोधण्यास सुरुवात केली. ISI आणि तालिबानच्या भीतीने अफगाण सैनिक बख्तरबंद वाहने आणि पिकअप ट्रकमध्ये इराणला जाण्यासाठी वाळवंटातून जात होते. त्याच पद्धतीने चौक्या टाकून तपासणी केली जात होती.
रविवारी, 15 ऑगस्ट रोजी तालिबानने काबूलवर ताबा मिळवल्यानंतर अनेक अफगाण सैनिकांनी शस्त्रे टाकली. त्यांनी आपली लष्करी गणवेश उतरवला आणि आपला जीव वाचवण्यासाठी ते काबूलहून लपून दुसऱ्या ठिकाणी पळून जाणाऱ्यांमध्ये इतरांसह सामील झाले.
ज्यांनी अमेरिकन आणि नाटो फौजांसोबत काम केले आणि तालिबानच्या विरोधात त्यांना मदत केली असे म्हटले जाते त्यांचा तालिबानी मोठ्या प्रमाणावर शोध घेत आहेत. अफगाणिस्तानच्या माजी अधिकाऱ्यांच्या मते, तालिबानने अशी एक हिट लिस्टच तयार केली आहे. अमेरिकेचे सहकारी पुढे आले नाहीत तर त्यांच्या कुटुंबाला ठार मारण्याची धमकी तालिबानने दिली आहे.
संयुक्त राष्ट्रांच्या (UN) रिपोर्टमध्ये असे म्हटले गेले आहे. हा रिपोर्ट इशारा देतो की,’ तालिबान अमेरिका किंवा त्याच्या नाटो सैन्याला पाठिंबा देणाऱ्या अफगाणांचा घरोघरी जाऊन शोध घेत आहे. ‘न्यूयॉर्क टाइम्स’ च्या रिपोर्ट नुसार, संयुक्त राष्ट्र म्हणते की,” तालिबानने ज्यांना अटक करून ठार मारण्याची इच्छा आहे अशा लोकांची लिस्टच तयार केली आहे. त्याचबरोबर ते या लोकांना धमकी देत आहे की, जर ते पुढे आले नाहीत तर त्यांच्या कुटुंबातील सदस्यांना ठार मारले जाईल किंवा अटक केली जाईल.”