Kalyan Murbad Railway Project : मुंबई उपनगर आणि मुरबाड तालुक्याला जोडणारा बहुप्रतीक्षित कल्याण–मुरबाड रेल्वे मार्ग अखेर मार्गी लागण्याच्या मार्गावर आहे. तब्बल 836.12 कोटी रुपयांचा निधी मंजूर झाल्याने, हा प्रकल्प केवळ कागदावर न राहता प्रत्यक्ष कृतीत उतरणार आहे. राज्याच्या परिवहन विकासात क्रांतिकारी पाऊल टाकणारा हा प्रकल्प केवळ नवीन रेल्वे लाईन नसून, हे हजारो प्रवाशांच्या स्वप्नांचे उत्तर आहे. दररोज गर्दीतून प्रवास करणाऱ्या कामगार वर्गासाठी, विद्यार्थी आणि व्यापाऱ्यांसाठी हा रेल्वे मार्ग मोठा दिलासा देणारा (Kalyan Murbad Railway Project) ठरणार आहे.
हा रेल्वे मार्ग नक्की कुठून कुठे?
नव्या रेल्वे मार्गाची सुरुवात कल्याणच्या आंबिवली स्टेशनपासून होणार असून, तो थेट मुरबाडपर्यंत धावणार आहे. सुमारे 28 किलोमीटर लांबीचा हा मार्ग स्थानिकांच्या जीवनात मोठा बदल घडवून आणू शकतो.
विकासाच्या मार्गावर थांबलेली गाडी अखेर हलली!
हा प्रकल्प काही वर्षांपासून रखडलेला होता. मात्र भिवंडी लोकसभा मतदारसंघाचे खासदार सुरेश म्हात्रे यांनी संसदेत हा मुद्दा जोरकसपणे मांडल्यामुळे केंद्र सरकारने दखल घेतली. त्याचा थेट परिणाम म्हणजे प्रकल्पासाठी 836 कोटी रुपयांची तरतूद झाली आहे.
काय बदल होईल या प्रकल्पामुळे? (Kalyan Murbad Railway Project)
- कल्याण–मुरबाड प्रवासाचा वेळ लक्षणीयरीत्या कमी होईल.
- रेल्वे सेवा सुरू झाल्यानंतर रस्त्यावरील वाहतुकीचा ताण कमी होईल.
- मुरबाडसारख्या भागात गुंतवणूक आणि रोजगाराच्या संधी वाढतील.
- स्थानिक पर्यटन आणि शेतीप्रधान अर्थव्यवस्थेला चालना मिळेल.
भूमी अधिग्रहण आणि काम लवकरच सुरू होणार
केंद्रीय रेल्वे राज्यमंत्री रवनीत सिंह बिट्टू यांनी नुकतीच माहिती दिली की, निधी उपलब्ध झाल्यामुळे लवकरच भूमी अधिग्रहणास सुरुवात होईल. प्रकल्पाच्या उर्वरित तांत्रिक व प्रशासकीय कामांनाही गती मिळणार आहे.
प्रत्येक रेल्वे ट्रॅक मागे असते विकासाची हाक
महाराष्ट्रात झपाट्याने वाढणाऱ्या लोकसंख्येला चालना देणाऱ्या पायाभूत सुविधा ही काळाची गरज आहे. कल्याण–मुरबाड रेल्वे मार्ग केवळ एक ट्रान्सपोर्ट प्रोजेक्ट नाही, तर उपनगरी व ग्रामीण भागाला एकमेकांशी मजबूत जोडणारी लाइफलाइन ठरणार आहे.
