कराड प्रतिनिधी । सकलेन मुलाणी
पुणे- बेंगलोर महामार्गावर कराड जवळ चारचाकी गाडीच्या धडकेत BSF जवानाचा मृत्यू झाला आहे. राजस्थानहून शेवाळवाडी- उंडाळे गावी सुट्टीला आलेल्या जवानांच्या दुचाकीला पाठीमागून कारने धडक दिली असून नितीन शेवाळे या BSF मधील जवानाचा मृत्यू झाला तर त्याचा भाऊ प्रथमेश शेवाळे जखमी झाला आहे.
याबाबत अधिक माहिती अशी की, भारतीय सैन्यदलात सेवा बजावणारे नितीन शेवाळे हे सुट्टीसाठी त्यांच्या गावी शेवाळेवाडी येथे आले होते. आज त्यांच्या चुलत भावाला रुग्णालयात बघण्यासाठी ते दुचाकी वरून रूग्णालयात येत होते. त्याचवेळी पुणे-बंगळूर महामार्गावर जखीणवाडी येथील मळाईदेवी पतसंस्थेसमोर पुण्याच्या दिशेने निघालेल्या भरधाव कारने पाठिमागून त्यांच्या दुचाकीला जोरदार धडक दिली. ही धडक इतकी भीषण होती की यामध्ये दुचाकीस्वार दोघेही महामार्गावरच फरपटत गेले. त्यात ते दोघेही गंभीर जखमी झाले.
यांनतर दोघांनाही कृष्ण रुग्णालयात दाखल करण्यात आले यावेळी डॉक्टरांनी जवान नितीन शेवाळे यांना मृत घोषित केलं तर दुसऱ्या जखमींवर अतिदक्षता विभागात उपचार सुरू आहेत. हादरवरून सोडणाऱ्या या घटनेमुळे शेवाळेवाडी गावावर शोककळा पसरली आहे. कराड शहर पोलीस ठाण्याचे कर्मचारी ए ए ईनामदार व प्रशांत जाधव यांनी अपघातस्थळाचा पंचनामा केला. अपघातग्रस्त वाहने बाजूला करून महामार्गावरील वाहतूक सुरळीत केली. सध्या या अपघाताची नोंद करण्याचे काम सुरू होते.