कराड उपजिल्हा रुग्णालयातील 6 कर्मचार्‍यांना कोरोनाची लागण, जिल्ह्यातील रुग्णसंख्या ५२ वर

कराड प्रतिनिधी | सकलेन मुलाणी

कराड येथील वेणुताई चव्हाण उपजिल्हा रुग्णालयातील 6 कर्मचार्‍यांना कोरोनाची लागण झाल्याची धक्कादायक माहिती समोर आली आहे. उपजिल्हा रुग्णालय, कराड येथे बाळंतपणासाठी आलेल्या कोविड बाधित गरोदर मातेच्या संपर्कात आलेले 6 आरोग्य कर्मचारी, 1 गरोदर माता व 1 निकट सहवासित असे एकूण 8 नागरिकांचा अहवाल कोविड-19 बाधित असल्याचे बी.जे. वैद्यकीय महाविद्यालय, पुणे यांनी कळविले आहे, प्राथमिक तपासण्यानंतर या सर्वांची प्रकृती स्थिर असून, विलगीकरण कक्षात लागू असलेल्या सर्व नियमानुसार काटेकोरपणे निगराणीखाली उपचार चालू आहेत, अशी माहिती जिल्हा शल्यचिकित्सक डॉ. आमोद गडीकर यांनी दिली आहे.

ताज्या आकडेवारीनुसार कराड तालुक्यातील कोरोनाबाधितांची संख्या आता 41 वर पोहोचली आहे. तर सातारा जिल्ह्यातील एकुण कोरोनाग्रस्तांचा आकडा 52 झाला आहे. कराड शहरातील उपजिल्हा रुग्णालयातील कर्मचार्‍यांनाच कोरोनाची बाधा झाल्यामुळे कराड आणि परिसरात एकच खळबळ उडाली आहे. बाधितांमध्ये आरोग्य सेविकांचा समावेश असून सातारा जिल्ह्यात कोरोना बाधित रुग्णांचे अर्धशतक पुर्ण आहे. याआधी सातारा जिल्हा रुग्णालयातील एका महिला कर्मचाऱ्याची कोरोना चाचणी पॉझिटिव्ह आली होती. त्यानंतर सातारा शहर आणि आसपासची 9 गावे संपूर्ण सील करण्याचे आदेश जिल्हाधिकारी यांनी दिले होते.

दरम्यान, कराड तालुक्यात ३ एप्रिल रोजी कोरोनाचा पहिला रुग्ण सापडला होता. त्यानंतर हळू हळू रुग्णांच्या संख्येत वाढ होत गेली. महिणाभरात तालुक्यातील रुग्णसंख्या आता 41 वर पोहोचली आहे. कराड शहर आणि मलकापूरसह आसपासची 11 गावे जिल्हाधिकारी यांनी याआधीच कंटेनमेंट झोन म्हणून जाहीर केली आहेत. सातारा जिल्ह्यातील अर्ध्याहून अधिक रुग्ण हे एकट्या कराड तालुक्यात असल्याने इथे प्रशासनाकडून योग्य ती खबरदारी घेतली जात आहे. मात्र तरिही कोरोनाचे रुग्ण वाढत असल्याने नागरिकांमध्ये आता भितीचे वातावरण निर्माण झाले आहे.

You might also like