अहमदनगर । कोरोनाचा (Covid 19 Report) चुकीचा अहवाल दिल्याप्रकरणी पद्मश्री डॉ. विठ्ठलराव विखे-पाटील रुग्णालयाच्या लॅब अधिकाऱ्यांविरुद्ध फसवणुकीचा गुन्हा दाखल करण्यात आला आहे. करोना पॉझिटिव्ह असल्याचा खोटा अहवाल दिल्याप्रकरणी विळदघाट येथील विखे-पाटील रुग्णालयाच्या क्रस्ना डिग्नोस्टिकस प्रा. लि लॅबचे प्रभारी अधिकारी, लॅब टेक्निशिन यांच्यावर फसवणुकीचा गुन्हा दाखल झाला आहे. येथील बांधकाम व्यावसायिक अशोक खोकराळे यांनी याप्रकरणी पोलिसात फिर्याद दिली आहे. हा प्रकार १३ ऑगस्ट २०२० ते ११ नोव्हेंबर २०२० या काळात घडला आहे.
अशोक खोकराळे यांचे वडील बबनराव नारायण खोकराळे (वय ७९ वर्ष) यांचे दोन बनावट व खोटे कोरोना पॉझिटिव्ह रिपोर्ट तयार करुन फिर्यादीची व त्यांच्या कुटुंबाची फसवणूक केली, असे या तक्रारीत म्हटले आहे. बबनराव खोकराळे यांना १३ ऑगस्ट २० रोजी घशात खवखव होत असल्याने हॉटेल पतियाळा हाऊस कोविड सेंटरमध्ये दाखल केले होते. तेथून त्यांना परस्पर न्युक्लिअस हॉस्पिटलमध्ये नेण्यात आले. १६ ऑगस्ट रोजी त्यांना करोना झाल्याचे नातेवाईकांना सांगण्यात आले. त्यानंतर १८ ऑगस्टला त्यांचा करोनामुळे मृत्यू झाल्याचे सांगितले. १९ ऑगस्टला अमरधाममध्ये अंत्यसंस्कार झाले. त्यानंतर खोकराळे यांनी उपचारांची कागदपत्रे काही तज्ज्ञांना दाखवली असता रिपोर्टबाबत शंका उपस्थित झाली. त्यामुळे त्यांनी प्रशासनाकडे तक्रार केली.
सरकारच्या आदेशानुसार महापालिकेने या प्रकरणाची चौकशी केली. उपचार करणाऱ्या डॉक्टरांना बबनराव खोकराळे यांचा कोरोना रिपोर्ट दाखवण्यास सांगितला. मात्र, संबंधित हॉस्पिटलने तो नंतर सादर करू, असे सांगितल्याने खोकराळे यांचा संशय बळावला. त्यांनी शहरातील सर्व सरकारी कोव्हिड सेंटरमध्ये जाऊन बबनराव खोकराळे यांच्या करोना रिपोर्टबाबत चौकशी केली. तेथे कोठेही असा रिपोर्ट केला गेला नसल्याचे त्यांना सांगण्यात आले.
त्यानंतर विळद घाटातील डॉ. विखे मेमोरियल हॉस्पिटलमधील क्रस्ना डिग्नोस्टिक लॅबमध्ये चौकशी केली असता तेथे बबनराव खोकराळे यांचे सलग दोन दिवस आरटीपीसीआर चाचणी रिपोर्ट केल्याचे अहवाल मिळाले. त्यावरील फोन नंबरवर चौकशी केली असता ते दोन वेगवेगळ्या व्यक्तींचे नंबर होते. ते त्या व्यक्तींचेच रिपोर्ट होते. त्या रिपोर्टनुसार त्यांनी करोना उपचारही घेतल्याचे समजले. त्यावरून बबनराव खोकराळे यांचे ते रिपोर्ट नसल्याचे स्पष्ट झाले. त्यामुळे क्रस्ना डिग्नोस्टिक लॅबचे अधिकारी, लॅब टेक्निशियन व कर्मचाऱ्यांविरुद्ध त्यांनी फसवणुकीची फिर्याद दिली आहे. एमआयडीसी पोलिस ठाण्यात गुन्हा दाखल झाला आहे.
ब्रेकिंग बातम्या मोबाईलवर मिळवण्यासाठी आम्हाला 7972630753 या नंबरला whatsapp करा आणि लिहा ‘Hello News’