हॅलो महाराष्ट्र ऑनलाईन । Ladki Bahin Yojana – एप्रिल महिना सुरू होण्यास काहीच दिवस शिल्लक आहेत, अन लाडकी बहीण योजनेच्या एप्रिल महिन्याच्या हप्त्याबाबत सर्वांच्या मनात शंकेचे वातावरण आहे. अनेक लाभार्थींच्या मनात हा प्रश्न उपस्थित झाला आहे की, एप्रिल महिन्याचा हप्ता कधी मिळणार? पण , या महिन्याचा हप्ता कधी दिला जाणार , याची स्पष्ट तारीख जाहीर करण्यात आलेली नाही. कारण लाडकी बहीण योजनेच्या अर्जांची तपासणी अजून पूर्ण झालेली नाही, त्यामुळे हप्त्याची प्रक्रिया काही काळ लांबणीवर जाऊ शकते. यामुळे लाडक्या बहिणींच्या मनात अनेक शंका आणि प्रश्न आहेत.
लाडकी बहीण योजनेच्या अर्जाची तपासणी (Ladki Bahin Yojana)–
लाडकी बहीण योजनेच्या अर्जाची तपासणी सध्या तीव्रतेने सुरू आहे, ज्यामध्ये महिलांच्या चारचाकी वाहनांची तपासणी पूर्ण करण्यात आली आहे. योजनेतील लाभ घेणाऱ्या महिलांचे उत्पन्न आणि अर्जांची बारकाईने पडताळणी केली जात आहे, आणि यासाठी परिवहन विभागाच्या मदतीने संबंधित माहिती गोळा करण्यात आली आहे. याशिवाय, महिला व बालविकास विभागाने आयकर विभागाकडून 2.63 लाख लाभार्थी महिलांच्या उत्पन्नाची माहिती मागवली आहे, परंतु अजून ही माहिती मिळालेली नाही. त्यामुळे तपासणीच्या कामात विलंब होण्याची शक्यता आहे, आणि त्यावर अधिकारी अधिकृत माहिती देण्याची प्रतिक्षा करत आहेत.
हप्त्याचे वितरण लांबणीवर जाणार –
लाडकी बहीण योजनेमध्ये ( Ladki Bahin Yojana ) एक नियम आहे की, 2.5 लाखापेक्षा जास्त उत्पन्न असलेल्या महिलांना लाभ मिळणार नाही, पण अनेक महिलांनी या नियमाचा उल्लंघन करून लाभ घेतल्याचे समोर आले आहे. यावर तपासणी सुरू असून, अर्जाची पडताळणी पूर्ण झाल्यानंतरच महिलांना लाभ देण्यात येईल. महिला व बालविकास मंत्री आदिती तटकरेंच्या वतीने याबाबत स्पष्ट करण्यात आले की, एप्रिल महिन्याच्या हप्त्याचे वितरण लांबणीवर जाऊ शकते, कारण तपासणी प्रक्रिया अजून पूर्ण झालेली नाही.
