हॅलो महाराष्ट्र ऑनलाईन| तब्बल 17 वर्षानंतर भारताने वर्ल्ड कप (World Cup) जिंकल्यामुळे देशभरात आनंदाचे वातावरण पसरले आहे. या विजयामागे भारतीय खेळाडूंचा मोठा हात असल्यामुळे त्यांचे देशभरातून कौतुक केले जात आहे. याचाच एक भाग म्हणून आज विधानसभेत T20 वर्ल्ड कप विजयी संघातील 4 मुंबईकर खेळाडूंचा सन्मान करण्यात आला. यामध्ये, कॅप्टन रोहित शर्मा, सूर्यकुमार यादव, शिवम दुबे आणि यशस्वी जयस्वाल या चौघांचा समावेश होता. खास म्हणजे, यावेळी विधानसभेत रोहित शर्माच्या (Rohit Sharma) नावाचा जोरदार जयघोष झाला.
आज विधानसभेतील सेंट्रल हॉलमध्ये विजय खेळाडूंचा सत्कार सोहळा आयोजित करण्यात आला होता. या कार्यक्रमांमध्ये टीम इंडियाच्या चारही खेळाडूंनी आपले मनोगत व्यक्त केले. ज्यावेळी रोहित शर्मा मनोगत व्यक्त करण्यासाठी पुढे आला तेव्हा त्याच्या चहात्यांनी जोरदार घोषणा देण्यास सुरुवात केली. तसेच , “भारताचा राजा रोहित शर्मा” असे म्हणत त्याच्या नावाचा जयघोष केला. हे पाहून रोहित शर्माला देखील भरून आले.
आपले मनोगत व्यक्त करताना रोहित शर्मा म्हणाला की, “हे यश काही आमच्या चौघांचं नाही, साऱ्या टीम इंडियाचं आहे. बरं झालं सूर्याच्या हातात कॅच बसला, नाहीतर त्याला आम्ही बसवला असता” रोहितच्या या वक्तव्यानंतर सेंट्रल हॉलमध्ये एकच हशा पिकला. त्याचबरोबर, “आमच्यासाठी विधानसभेमध्ये असा काहीतरी कार्यक्रम ठेवण्यात आला आहे हे पाहून प्रचंड आनंद झाला आहे.” अशा भावना ही व्यक्त केल्या.