औरंगाबाद – मागास व आदिवासी प्रवर्गातील विद्यार्थ्यांना शैक्षणिक लाभ मिळण्यासाठी शिष्यवृत्त्या, शैक्षणिक साहित्य, प्रशिक्षण, इंग्रजी शाळेतील प्रवेशाबाबत तसेच व्यावसायिक अभ्यासक्रमासाठी देण्यात येणाऱ्या शिष्यवृत्त्यांचे प्रस्ताव पाठविण्यासाठी काटेकोर तपासणी करण्याचे आदेश इतर मागास बहुजन कल्याण विभाग, मदत व पुनर्वसन मंत्री विजय वडेट्टीवार यांनी आज येथे दिले. आश्रम शाळेच्या व विभागातील आपत्ती व्यवस्थापन आढावा विषयक विभागीय आयुक्त कार्यालयात आयोजित बैठकीत ते बोलत होते.
या बैठकीस विभागीय आयुक्त सुनील केंद्रेकर, उपायुक्त पराग सोमण, समाजकल्याण विभागाचे प्रादेशिक उपायुक्त जलील शेख, औरंगाबादचे सहायक आयुक्त पी.जी.वाभळे, बीडचे सहायक आयुक्त सचिन मडावी, जालन्याचे सहायक आयुक्त अमित घवले, जिल्हा समाज कल्याण अधिकारी एस.एम.केंद्रे, सहायक संचालक शि.बा.नाईकवाडे, लेखा अधिकारी डॉ.सुधीर चाटे आदींची उपस्थिती होती. विभागीय आयुक्तांना महाज्योतीच्या विभागीय कार्यालयासाठी तात्काळ जागा उपलब्ध करुन देण्याचे आदेश वडेट्टीवार यांनी दिले. बीड जिल्ह्यातील उसतोड कामगारांच्या मुलांच्या शाळेचा आढावाही यावेळी त्यांनी घेतला. तसेच इंग्रजी भाषेतील परिपूर्ण शिक्षण देणाऱ्या शाळेत इतर मागासवर्गीया विद्यार्थ्यांना प्रवेश निश्चित करण्यासाठी शिक्षण विभागाच्या सहकार्याने पात्र विद्यार्थ्यांना प्रवेश निश्चित व्हावा जेणेकरुन इंग्रजी माध्यमाचे गुणवत्तापूर्ण शिक्षण मागास प्रवर्गातील विद्यार्थ्यांना मिळेल. यासाठी परिपूर्ण प्रस्ताव सादर करण्याची जबाबदारी समाज कल्याण विभागामार्फत करावी असे आदेशही यावेळी अधिकाऱ्यांना दिले. त्याचप्रमाणे प्रत्येक जिल्ह्यात स्वयंसेवी संस्थेच्या माध्यमातून जिल्ह्याच्या ठिकाणी इतर मागास प्रवर्गातील 100 विद्यार्थी संख्येचे वस्तीगृह तातडीने उभारण्याबाबत जागा आणि सुविधा उपलब्ध करण्याचे निर्देशही संबंधितांना वडेट्टीवार यांनी दिले.
विभागीय आयुक्त केंद्रेकर यांनी प्रास्ताविकात मराठवाड्यात आठही जिल्ह्यातील धरणांची पाणी क्षमता, शेतकरी आत्महत्या, गेल्या वर्षीच्या अवकाळी पावसाच्या नुकसानीबाबत तपशिलवार माहिती व यासाठी लागणाऱ्या निधीची मागणी, तसेच कोरोनाच्या संभाव्य तिसऱ्या लाटेच्या अनुषंगाने विभागाने केलेल्या तयारी बाबतचा आढावा सादर केला. यामध्ये ऑक्सिजन बेड, ऑक्सिजन निर्मिती क्षमता, लहान मुलांचे लसीकरण, कोविड उपचार याबाबत प्रशासनाची तयारी बाबत माहिती दिली.