महाराष्ट्रातील एसटी प्रवाशांसाठी एक आनंदाची बातमी समोर आली आहे. राज्यातील चार प्रमुख शहरांमधील बसस्थानकांचे आधुनिकीकरण होणार आहे. यासाठी शासनाने मोठा निर्णय घेतला असून, फडणवीस सरकारने एसटी प्रवाशांच्या सोयीसाठी बीओटी (बांधा, वापरा आणि हस्तांतरित करा) या तत्वावर बसस्थानकांचा विकास करण्याचे ठरवले आहे.
आता, राज्यातील काही बस स्थानकांचे आधुनिकीकरण करण्यात येणार असून, यामुळे प्रवाशांना अधिक सुविधा मिळणार आहेत. लवकरच निविदा काढल्या जातील आणि या प्रकल्पाची सुरुवात जळगाव जिल्ह्यातील चोपडा बसस्थानकाच्या पुनर्बांधणीपासून होणार आहे. चोपडा बसस्थानक गुजरात राज्यातील बसपोर्ट प्रकल्पाच्या धर्तीवर विकसित केले जाणार आहे.
पहिला टप्पा – 4 बस स्थानकांचा कायापालट
राज्याचे परिवहन मंत्री प्रताप सरनाईक यांनी सांगितले की, “गुजरातच्या बसपोर्ट प्रकल्पाचा अभ्यास करून महाराष्ट्रातील एसटी स्थानकांचे आधुनिकीकरण करण्यात येईल. पहिल्या टप्प्यात चोपड्यासह सिंधुदुर्ग जिल्ह्यातील सावंतवाडी, दोडामार्ग आणि आंबोली या बसस्थानकांचा समावेश आहे.” या टप्प्यातील चार स्थानकांचा कायापालट होणार आहे, ज्यामुळे स्थानिक नागरिकांना मोठा फायदा होईल.
सिंधुदुर्ग जिल्ह्यातील 2 नवीन स्थानक
कोकण विभागातील सिंधुदुर्ग जिल्ह्यातील आंबोली हे एक महत्त्वाचे पर्यटनस्थळ आहे. येथे बसस्थानकाचे आधुनिकीकरण करणे आवश्यक आहे. माजी मंत्री दीपक केसरकर यांनी आंबोलीसाठी आधुनिक बसस्थानक उभारण्याची मागणी केली होती, ज्यास सरकारने मान्यता दिली आहे. तसेच, सावंतवाडी आणि दोडामार्ग येथील बसस्थानकांसाठीही विकास आरंभ केला जाईल.
चोपडा बसस्थानक – हायटेक होणार
चोपडा जळगाव जिल्ह्यातील एक महत्त्वाचे व्यावसायिक केंद्र आहे, आणि मध्यप्रदेशच्या सीमेलगत असल्यामुळे येथून मोठ्या प्रमाणावर प्रवासी वाहतूक होते. स्थानिक आमदार चंद्रकांत सोनावणे यांनी चोपडा बसस्थानकाचा विकास बसपोर्टच्या धर्तीवर करण्याची मागणी केली होती. त्यांच्या आग्रहावरून या स्थानकाच्या पुनर्विकासास मान्यता मिळाली आहे आणि लवकरच निविदा प्रक्रिया सुरू होईल.
छत्रपती संभाजीनगर – सिल्लोड बसस्थानकावर कार्यवाही
छत्रपती संभाजीनगर जिल्ह्यातील सिल्लोड बसस्थानकावरील वाहतूक कोंडी दूर करण्यासाठी पर्यायी रस्ता उपलब्ध करून देण्याची मागणी माजी मंत्री अब्दुल सत्तार यांनी केली होती. याबाबत लवकरच निर्णय घेण्यात येईल, असे परिवहन मंत्री सरनाईक यांनी सांगितले.
आधुनिक सुविधा मिळणार
राज्यातील सर्व एसटी स्थानकांना प्रवाशांसाठी अत्याधुनिक व सोयीस्कर बनविण्याचे धोरण महामंडळाने निश्चित केले आहे. पुढील टप्प्यात इतर शहरांतील बसस्थानकांचा विकास करण्यात येणार आहे. त्यात अत्याधुनिक तिकीट प्रणाली, आरामदायी प्रतीक्षागृहे, स्वच्छतागृहे, फूड कोर्ट आणि डिजिटल माहिती फलक यांसारख्या सुविधांचा समावेश असणार आहे.
