सरकारी धान्य कोठारांमध्ये कोट्यावधी टन गहू आणि तांदूळ होतोय खराब, सरकार याद्वारेच करणार आहे इथेनॉलची निर्मिती

नवी दिल्ली । पेट्रोल – डिझेलचे वाढणारे दर लक्षात घेता केंद्र सरकार इथेनॉल बनवण्यावर भर देत आहे. जेणेकरून पेट्रोल आणि डिझेलमध्ये इथेनॉल ब्लेंडिंग करता येईल. यामुळे दरवर्षी कोट्यावधी लिटर इथेनॉल तयार होत आहे. सरकारी गोदामांमध्ये खराब होत असलेल्या गहू आणि तांदळासह डाळीद्वारे इथेनॉल बनवणार असल्याचे सांगितले जात आहे. फूड कॉर्पोरेशन ऑफ इंडिया (FCI) च्या गोदामांमध्ये दरवर्षी हजारो टन गहू आणि तांदूळ खराब होतात. हा गहू-तांदूळ 40 ते 50 पैसे किंवा त्यापेक्षा कमी दराने विकला जातो.

दहा वर्षांत 1.80 लाख टन गहू आणि तांदूळ खराब झाला
आरटीआयद्वारे मिळालेल्या माहितीनुसार, FCI च्या दिल्लीस्थित मुख्य कार्यालयाने म्हटले आहे की,”2008-9 ते 2017-18 या कालावधीत गेल्या दहा वर्षात सर्वसामान्यांना देण्याच्या अवस्थेत नसणारे सुमारे 1.80 लाख मे.टन गहू-तांदूळ या गोदामांमध्ये खराब झाले आहे. जर आपण 16 टन क्षमतेच्या ट्रकनुसार मोजणी केली तर गेल्या 10 वर्षात या गोदामात साठवलेल्या सुमारे 11250 ट्रक धान्याचे नुकसान झाले आहे. जर आपण केवळ 5 वर्षांची चर्चा केली तर 2013-14 ते 2017-18 या कालावधीत एकूण 58097 टन गहू-तांदळाचे नुकसान झाले. त्यामध्ये 27330 टन गहू आणि 30767 टन तांदूळ होता.

गहू तसेच तांदूळ कोठे आणि किती खराब झाले आहेत
FCI च्या स्वत: च्या आणि भाड्याने दिलेल्या गोदामांमध्ये दरवर्षी किती गहू आणि तांदूळ खराब होतो, याविषयीची माहिती ही आरटीआयद्वारे मागविण्यात आली. परंतु अनेक FCI कार्यालयांकडून ही माहिती देण्यात आलेली नाही. परंतु जिथून माहिती मिळाली आहे, त्या आकडेवारी वरून हे धक्कादायक सत्य समोर आले आहे. प्रादेशिक कार्यालय भुवनेश्वर यांनी सांगितले की,”गेल्या 6 वर्षात त्यांचे 8 हजार टनांहून अधिक धान्य खराब झाले आहे.”

त्याच वेळी, क्षेत्रीय कार्यालय कोलकाताच्या मते, गेल्या 6 वर्षात 15365 टन धान्य खराब झाले. प्रादेशिक कार्यालय बंगळुरूमध्ये 11 वर्षात 3719 टन अन्नधान्याचे नुकसान झाले. प्रादेशिक कार्यालय अहमदाबाद येथे 8 वर्षात 3191 टन अन्नधान्याचे नुकसान झाले. प्रादेशिक कार्यालय पाटणा येथून मिळालेल्या माहितीनुसार 6 वर्षात 6716 टन अन्नधान्याचे नुकसान झाले आहे.

कोठारात खराब झालेले हे धान्य किती दराने विकले जाते
एफसीआय गोदामांमध्ये खराब होणारे हे धान्य जे लोकांना दिले जाऊ शकत नाही, ते प्राणी आणि पोल्ट्री पदार्थ बनविणार्‍या कंपन्यांना लिलावात देतात. आरटीआयमध्ये एफसीआयने सांगितले आहे की,”या धान्यांची गुणवत्ता ते किती प्रमाणात खराब झाले आहे, त्यानुसार त्यांचे दर लावून कंपन्यांना विकले जाते.”

ब्रेकिंग बातम्या मोबाईलवर मिळवण्यासाठी आम्हाला 7972630753 या नंबरला WhatsApp करा आणि लिहा “Hello News”.