हॅलो महाराष्ट्र ऑनलाईन । भारताचा स्टार जलदगती गोलंदाज मोहम्मद शमी (Mohammed Shami) आणि टेनिस स्टार सानिया मिर्झा (Sania Mirza) यांच्या लग्नाची चर्चा मागील काही दिवसांपासून सोशल मीडियावर सुरु आहे. शमीने पत्नी हसीन जहाँपासून घटस्फोट घेतला आहे तर दुसरीकडे सानिया मिर्झा आणि शोएब मलिक यांचं नातं सुद्धा तुटलं आहे. दोघेही सध्या सिंगल लाईफ जगत असल्याने त्यांच्या लग्नाची चर्चा सोशल मीडियावर सुरु असते. यापूर्वी सानिया मिर्झाच्या वडिलांनी या चर्चात कसलंही तथ्य नसल्याचे स्पष्ट केलं होते, आता मोहम्मद शमीने सुद्धा सानिया मिर्झासोबतच्या लग्नाच्या चर्चा फेटाळून लावल्या असून हिम्मत असेल तर व्हेरिफाईड पेजवरून अशा अफवा पसरवून दाखवा असं आव्हानही दिले.
शुभंकर मिश्रा यांना दिलेल्या मुलाखतीत शमीने सानिया मिर्झासोबतच्या लग्नाच्या अफवेबद्दल मौन सोडलं. शमी म्हणाला हे खूप विचित्र आहे. जाणूनबुजून असं कोणीतरी करतंय, पण असं एखाद्याला असं खेचलं नाही पाहिजे. मीम्स तुमच्या मनोरंजनासाठी आहेत याबाबत मी सहमत आहे, पण कोणाच्या तरी आयुष्याशी त्याचा संबंध जोडू नका. विचार करून मिम्स बनवा. कोणत्याही अनधिकृत पेजवरून तुम्ही मिम्स बनवताय, त्यावर तुमचा पत्ता नाही, लोक तुम्हाला ओळखत माहित त्यामुळे तुम्ही काहीही बोलू शकतात. तुमच्यात हिम्मत असेल तर व्हेरिफाईड पेजवर बोलून दाखवा, मग तुम्हाला सांगतो असं आव्हान शमीने दिले.
दरम्यान, यापूर्वी सानिया मिर्झाच्या वडिलांनीही या प्रकरणी स्पष्टीकरण दिले होते आणि शमी-सानियाच्या लग्नाच्या बातम्या केवळ अफवा असल्याचे त्यांनी म्हटले होते. आता शमीनेही याबाबत सर्व काही खरं खोट जगासमोर स्पष्ट केलं आहे. मोहम्मद शमी सध्या दुखापतीने त्रस्त असून तो भारतीय क्रिकेट संघाच्या बाहेर आहे. २०२३ च्या ५० षटकांच्या वर्ल्डकप स्पर्धेत शमीने अफलातून कामगिरी करत भारतीय संघाला अंतिम फेरीपर्यंत पोहचवलं होतं. त्यानंतर दुखापतीमुळे तो संघाच्या बाहेर गेलाय. शमी आता लवकरच बरा होईल आणि पुनरागमन करेल अशी आशा त्याच्या चाहत्यांना आहे.