विशाखापट्टनम | नक्षलवाद्यांनी दोन आमदारांची भर रस्त्यात हत्या केल्याचा धक्कादायक प्रकार आध्रप्रदेशातील विशाखापट्टनम जिल्ह्यात घडला आहे. तब्बल ५० माओवाद्यांनी कार्यकर्त्यांच्या डोळ्यांसमोर तेलगू देसम पार्टीचे एक आमदार आणि एक माजी आमदार यांच्यासह अन्य दोघांची हत्या केली आहे. या घटनेने संपुर्ण आंध्रप्रदेश हादरुन गेले असून विशाखापट्टनम परिसरात दहशतीचे वातावरण पसरले आहे.
हाती आलेल्या माहितीनुसार, विशाखापट्टनम जिल्ह्यातील तेलगू देसम पक्षाचे आमदार किडारी सर्वैश्वरराव आणि माजी आमदार सोमु हे दिनांक २३ सप्टेंबर रोजी जनसंपर्क दौ-यावर गेले होते. त्यावेळी ५० सशस्त्र माओवाद्यांनी त्यांचा रस्ता अडवला आणि कार्यकर्त्यासमोरच त्यांना गोळया घालुन ठार केले. यावेळी तब्बल ५० माओवादी उपस्थित असल्याचे बोलले जात आहे.
दरम्यान, आंध्रप्रदेशमध्ये बॉक्साईडच्या काही खाणींचे उत्खनन होणार होते. परंतू माओवाद्यांचा त्या खाणप्रकल्पाला विरोध होता. या सगळ्याचा बदला घेण्यासाठीच माओवाद्यांनी भर रस्त्यात आमदारांची हत्या केली असल्याचं सूत्रांकडून सांगण्यात येत आहे
