मुंबईकरांसाठी लवकरच एक दिलासादायक बदल घडणार आहे. पश्चिम उपनगरातील जोगेश्वरी येथे नव्याने उभारले जात असलेले टर्मिनस केवळ एक रेल्वे स्थानक न राहता, ते एक अत्याधुनिक मल्टीमोडल ट्रान्स्पोर्ट हब ठरणार आहे. मेट्रो, लोकल आणि लांब पल्ल्याच्या गाड्यांना थेट जोडणाऱ्या या टर्मिनसचे काम अंतिम टप्प्यात असून, डिसेंबर 2025 पर्यंत प्रवाशांसाठी खुले होण्याची शक्यता आहे.
मुंबईसारख्या गतिमान शहरासाठी दळणवळणाच्या सुविधा अधिक सक्षम आणि सुकर करणे ही काळाची गरज बनली आहे. याच पार्श्वभूमीवर, जोगेश्वरी येथे नव्या रेल्वे टर्मिनसचे काम जलद गतीने सुरू असून, हे टर्मिनस पूर्णत्वास येताच मुंबईला मिळणार आहे सातवे टर्मिनस स्थानक.
अमृत भारत योजनेचा भाग
भारतीय रेल्वेच्या ‘अमृत भारत’ योजनेअंतर्गत उभारले जात असलेले हे टर्मिनस भविष्यातील वाहतूक गरजांना लक्षात घेऊन उभारले जात आहे. सुरुवातीला येथे दोन प्लॅटफॉर्म कार्यान्वित होतील आणि पुढील टप्प्यात तिसऱ्या प्लॅटफॉर्मसह संपूर्ण सुविधा सुरू करण्यात येतील.
काय असेल खास?
- एकूण 3 प्लॅटफॉर्म आणि 3 मार्गिका
- पाच मजली मुख्य स्टेशन इमारत आणि दोन मजली सेवा इमारत
- अंडरग्राउंड पार्किंग, लिफ्ट, सरकते जिने, सोलर एनर्जीचा वापर
- मल्टीमोडल कनेक्टिव्हिटीसाठी नियोजन
- मेट्रो मार्ग 2A, 6 आणि 7 यांच्याशी थेट संपर्क
- 24 डब्यांचे लांब पल्ल्याचे गाड्यांसाठी फलाट
उपनगरीय प्रवाशांना दिलासा
सध्या लांब पल्ल्याच्या प्रवासासाठी चाकरमान्यांना कुर्ला, सीएसएमटी किंवा मुंबई सेंट्रल गाठावी लागते. परंतु जोगेश्वरी टर्मिनस कार्यरत झाल्यानंतर या प्रवाशांना त्यांच्याच परिसरात गाडी पकडता येणार आहे. यामुळे फक्त वेळेचीच नव्हे तर उपनगरीय रेल्वेवरील ताणाचीही बचत होणार आहे.
प्रभाव आणि बदल
या टर्मिनसवरून किमान 12 लांब पल्ल्याच्या गाड्यांचे स्थानांतरण शक्य होईल. यामुळे पश्चिम रेल्वेवरील मुख्य स्थानकांवरील गर्दी कमी होण्यास मदत होईल. शिवाय, एक्सप्रेस हायवेच्या जवळ असलेले हे टर्मिनस प्रवाशांसाठी अत्यंत सोयीचे ठरणार आहे.
स्थानिक कनेक्टिव्हिटीचा उत्तम समन्वय
राम मंदिर रेल्वे स्थानकापासून अवघ्या 500 मीटरवर असलेल्या या टर्मिनसच्या स्थापनेमुळे मुंबईतील मेट्रो, लोकल आणि एक्स्प्रेस ट्रेन यांचे परस्पर कनेक्शन अधिक सुलभ होणार आहे.
जोगेश्वरी टर्मिनस फक्त एका नवीन स्टेशनपुरता मर्यादित न राहता, मुंबईच्या प्रवास संस्कृतीत एक मोठा टप्पा ठरणार आहे. येत्या काही महिन्यांत हे टर्मिनस कार्यरत झाल्यास, पश्चिम उपनगरातील लाखो प्रवाशांसाठी हा एक ‘गेम चेंजर’ ठरेल, यात शंका नाही.
