हॅलो महाराष्ट्र ऑनलाईन। (New Marathi Movie) मराठी कालविश्वात कायम नवनवीन प्रयोग होत असतात. त्यामुळे गेल्या काही काळात मराठी सिने इंडस्ट्रीने आपला प्रेक्षक वर्ग वाढवल्याचे दिसून आले आहे. अनेक निर्माते, दिग्दर्शक आणि कलाकार मंडळी देखील उत्तम कलाकृती सादर करून प्रेक्षकांचे मन जिंकत आहेत. आता अशीच एक दर्जेदार कलाकृती आपल्या भेटीसाठी सज्ज झाली आहे. क्रिसेंडो एन्टरटेनमेंट निर्मित, ११ आंतरराष्ट्रीय पुरस्कार प्राप्त ‘लाईफ लाईन’ ह्या आगामी मराठी चित्रपटाची नुकतीच सोशल मीडिया वरून घोषणा करण्यात आली आहे.
‘लाईफ लाईन’ची घोषणा (New Marathi Movie)
आगामी चित्रपट लाईफ लाईनची नुकतीच सोशल मीडियावर घोषणा करण्यात आली आहे. त्यासोबत पहिल्या पोस्टरची देखील झलक पाहता येत आहे. सोबत आकर्षक शीर्षक लक्ष वेधून घेत आहे. नेमका या चित्रपटाचा विषय काय आहे? अशी उत्सुकता प्रत्येकाच्या मनात निर्माण होते आहे. आधुनिक विज्ञान आणि जुन्या रीतिरिवाजांचा संघर्ष अशी संकल्पना असणाऱ्या ह्या चित्रपटाचे कथानक दर्जेदार पद्धतीने सादर करण्यात आले आहे. ज्याची आता प्रेक्षकांना उत्सुकता लागली आहे.
‘हे’ कलाकार साकारणार मध्यवर्ती भूमिका
लोकप्रिय अभिनेते माधव अभ्यंकर आणि महाराष्ट्रभूषण पुरस्कार प्राप्त महानायक अशोक सराफ या सिनेमात मुख्य भूमिकेत दिसणार आहेत. सोबतीला हेमांगी कवी, भरत दाभोळकर, जयवंत वाडकर, शर्मिला शिंदे, संध्या कुटे आणि समीरा गुजर अशी तगड्या कलाकारांची फौज आहे. साहिल शिरवैकर दिग्दर्शित ‘लाईफ लाईन’ ह्या चित्रपटाची कथा, पटकथा, संवाद आणि गीत राजेश शिरवैकर यांचे आहेत. (New Marathi Movie) अशोक पत्की ह्यांनी संगीतबद्ध केलेल्या गीतांना अवधूत गुप्ते आणि माधुरी करमरकर ह्यांचा आवाज लाभला आहे. तर लालजी जोशी, कविता शिरवैकर, मिलिंद प्रभुदेसाई, संध्या कुलकर्णी, अमी भुता, संचीता शिरवैकर, उदय पंडीत, शिल्पा मुडबिद्री ‘लाईफ लाईन’ चे निर्माते आहेत. लवकरच हा चित्रपट प्रेक्षकांच्या भेटीला येणार आहे.
‘लाईफ लाईन’ चे तरुण दिग्दर्शक साहिल शिरवैकर म्हणतात, ‘सामाजिक भान आणि व्यावसायिक मूल्यं राखून हा चित्रपट आम्ही बनवलेला आहे. विधात्याने रेखाटलेली तळहातावरची ‘आयुष्य रेखा’ आपण वाढवू शकतो का? ह्या प्रश्नाचं उत्तर शोधण्याचा प्रयत्न आम्ही ह्या चित्रपटातून केलेला आहे. (New Marathi Movie) अनोखी कथा, अनोखा संघर्ष, अनोखी मांडणी, अनोखी पात्रनिवड आणि तगड्या कलाकारांच्या अभिनयाची जुगलबंदीही ह्या चित्रपटाची वैशिष्ट्यं म्हणता येतील. बाकी अशोक सराफ सर चित्रपटांच्या निवडीबाबत किती चोखंदळ असतात हे सर्वांना माहीत आहेच. त्यांनी आमचा चित्रपट स्विकारला म्हणजे विषय संपला’.