तालिबान्यांशी सुरू असलेल्या लढाईदरम्यान अफगाणिस्तानच्या 31 प्रांतांमध्ये लागू करण्यात आला नाईट कर्फ्यू

काबूल । तालिबान्यांशी सुरू असलेल्या लढाईदरम्यान अफगाण सरकारने तेथे नाईट कर्फ्यू जाहीर केला आहे. काबूल, पंजशीर आणि नांगरर वगळता 31 प्रांतांमध्ये हा नाईट कर्फ्यू लागू करण्यात आला आहे. या कर्फ्यूसाठी वेळही निश्चित करण्यात आली आहे, त्यानुसार रात्री 10 ते सकाळी 4 या वेळेत कर्फ्यू सुरू राहणार आहे. टोलो या वृत्तसंस्थेने शनिवारी रात्री उशिरा ही माहिती गृह मंत्रालयाच्या हवाल्याने दिली. ही नवी तरतूद अशा वेळी करण्यात आली आहे जेव्हा अफगाण सरकार देशातील 21 प्रांतांमध्ये तालिबानविरूद्ध लढा देत आहे.

हा निर्णय घेण्यामागील कारणही खूप महत्वाचे आहे. अफगाणिस्तान रेडिओ टेलिव्हिजननुसार, विविध प्रांतांच्या राजधानीत तालिबानी घुसखोरांचा शोध घेता यावा यासाठी हा निर्णय घेण्यात आला आहे. अफगाणच्या सुरक्षा एजन्सींनी जाहीर केलेल्या आकडेवारीनुसार सुरक्षा दलाने गेल्या 24 तासांत 262 तालिबानी मुलांना मारले आहे. त्याचबरोबर 176 तालिबानीही जखमी झाले आहेत. तथापि, तालिबान्यांनी ही आकडेवारी नाकारली आहे. अमेरिकेच्या नेतृत्वाखालील परदेशी सैन्याने मे महिन्यात अफगाणिस्तान सोडण्यास सुरुवात केल्यापासून तालिबान्यांनी येथे कहर केला आहे. तालिबान्यांनी देशातील 170 जिल्हे ताब्यात घेतल्याचा दावा करण्यात आला आहे.

विशेष म्हणजे अफगाणिस्तानातून सैन्याने माघार घेण्याच्या अमेरिकेच्या निर्णया नंतर तालिबान येथे वेगाने पसरू लागला आहे. देशाच्या विविध भागात बराच रक्तपात झाला आहे. सैनिकांबरोबरच सामान्य लोकांनी प्राण आणि संपत्तीही गमावली आहे. दरम्यान, गेल्या आठवड्यात कंदहारच्या बाहेरील भागात तालिबान्यांनी अफगाण सैन्यासह जोरदार युद्ध केले. त्याला प्रत्युत्तर म्हणून 22 जुलै रोजी अमेरिकेने दहशतवाद्यांच्या ताब्यात घेतलेल्या जागांवर हवाई हल्ले केले. तथापि, तालिबान्यांनी अमेरिकेच्या हल्ल्यांना दोहा कराराचे उल्लंघन म्हणत विरोध दर्शविला.