आता ‘या’ देशात फक्त चार तासच करावे लागणार काम

नवी दिल्ली । आधी कोरोना महामारी आणि आता रशिया-युक्रेन युद्धामुळे जगभरातील अर्थव्यवस्था पेट्रोलियमसह इतर वस्तूंच्या वाढत्या किंमतींनी हैराण झाल्या आहेत. यामुळेच आता अनेक देश आपला वाढता खर्च कमी करण्यासाठी नवनवीन मार्ग अवलंबत आहेत. यामध्ये आठवड्यातील कामकाजाचे दिवस कमी करण्याचा पर्यायही स्वीकारला जात आहे. अनेक देशांमध्ये आता आठवड्यातून फक्त चारच दिवस काम करण्याचा निर्णय घेण्यात आला आहे. काहीं देशांमध्ये ते कायमस्वरूपी तर काहींमध्ये तात्पुरते असेल.

टॅक्स ऐवजी कामाच्या दिवसाची वजावट
पेट्रोलियम उत्पादनांच्या वाढत्या किंमती कमी करण्यासाठी आता फिलीपिन्स आठवड्यातून चार दिवस काम करण्याचा फॉर्म्युला लागू करण्याचा विचार करत आहे. कोरोनामुळे उद्ध्वस्त झालेली अर्थव्यवस्था पुन्हा रुळावर आणण्यासाठी आणि त्यामुळे प्रअडचणीत आलेली क्षेत्रांना जास्तीत जास्त दिलासा देण्यासाठी फिलीपिन्सने पेट्रोलियम उत्पादनांवरील कस्टम ड्युटीमध्ये लक्षणीयरीत्या वाढ केली आहे. ते मागे घेण्यासाठी सरकारवर दबाव वाढत आहे. फिलीपिन्सचे अर्थमंत्री कार्लोस डोमिंग्वेझ म्हणाले की,”इंधनावरील टॅक्स कमी करण्याऐवजी आठवड्यातून चार दिवस कामाचे दिवस करण्याचा विचार केला जात आहे. यामुळे केवळ खर्चच कमी होणार नाही, तर 50 टक्के गरीब कुटुंबांसह इतर बाधित भागांना जास्तीत जास्त थेट मदत दिली जाऊ शकते.

रशिया-युक्रेन युद्धामुळे परिस्थिती बिघडत आहे
रशिया-युक्रेन युद्धामुळे कच्च्या तेलाच्या किंमती मोठ्या प्रमाणात वाढल्या आहेत. फिलीपिन्स आपले बहुतेक कच्चे तेल आयात करते. तेलाच्या किंमती वाढल्यामुळे आयातीवर जास्त परकीय चलन खर्च करावे लागते. हा खर्च भागवण्यासाठी त्यांनी टॅक्स वाढवला आहे.

अनेक देशांनी ‘हे’ सूत्र स्वीकारले आहे
चार कामाचे दिवस कायमस्वरूपी लागू करणारा UAE हा पहिला देश आहे. यानंतर बेल्जियमने त्याची अंमलबजावणी जाहीर केली. स्कॉटलंड, आइसलँड, स्पेन यासह इतर अनेक देशांमध्ये त्याची चाचणी यापूर्वीच सुरु केली गेली आहे. कामाचे दिवस कमी करण्याचा हा फॉर्म्युला कामगार आणि नोकरदार लोकांना आवडला आहे. मात्र, या काळात कामाचे तास वाढवले ​​जातात आणि बहुतांश ठिकाणी पगारही कापला जात नाही.