सातारा प्रतिनिधी | शुभम बोडके
महाराष्ट्र सरकारने सुपर मार्केटमध्ये वाईन विक्रीचा घेतलेला निर्णय मागे घ्यावा, यासाठी व्यसनमुक्त युवक संघ महाराष्ट्र यांच्यावतीने साताऱ्यात ‘दंडवत-दंडुका’ आंदोलन करण्यात आले. यावेळी दंडवत दंडुका आंदोलनाला पोलिसानी मज्जाव केल्याने वारकरी आणि पोलिसांच्यात काहीकाळ शाब्दिक चकमक उडाली. या दरम्यान वारकरी आंदोलनाच्या भूमिकेवर ठाम असल्याने काहीकाळ तणावाचे वातावरण निर्माण झाले. जमलेल्या वारकऱ्यांनी पोलिसांच्या दंडेलशाहीचा निषेध करत रस्त्यावरच दंडवत घालत प्रशासनाचा निषेध केला.
सरकारने सुपर मार्केटमध्ये वाईन विक्रीचा निर्णय घेतला असून हा निर्णय दुर्दैवी आहे. या निर्णयाची अंमलबजावणी करण्यापूर्वी तो तातडीने मागे घेण्यात यावा. या मागणीसाठी व्यसनमुक्त युवक संघ यांच्यावतीने आणि बंडातात्या कराडकर यांच्या मार्गदर्शनाखाली पोवईनाका येथील छत्रपती शिवाजी महाराज पुतळा ते जिल्हाधिकारी कार्यालय असे हातात लाकडी दांडू घेऊन दंडवत-दंडुका आंदोलन करण्यात आले. वाईन विक्रीचा निर्णय मागे घेण्याची विनंती यावेळी करण्यात आली असून या सरकारने ऐकलं तर ठीक अन्यथा हातात घेतलेला दंडुका सरकारला शुद्धीवर आणण्यासाठी दाखवण्यात येईल असा इशारा यावेळी कार्याध्यक्ष विलासबाबा जवळ यांनी दिला आहे.
कराडच्या आ. बाळासाहेब पाटलाचं पोरंगही दारू पितं ः बंडातात्या कराडकर
आंदोलनात ह. भ. प बंडातात्या कराडकर यांनी राजकीय नेत्यांवर जोरदार हल्लाबोल केला. ते म्हणाले, कोणत्या पुढाऱ्याची पोरं दारू पित नाहीत. कराडचे आमदार बाळासाहेब पाटील याचं पोरंगही दारू पितो का नाही मी सांगतो.