पंतप्रधान मोदींच्या हस्ते पुणे मेट्रोचे उद्घाटन; तिकीट काढून प्रवासही केला

हॅलो महाराष्ट्र ऑनलाइन | देशाचे पंतप्रधान नरेंद्र मोदी आज पुणे दौऱ्यावर आले असून मोदींच्या हस्ते पुणे मेट्रोचे उद्घाटन करण्यात आले. यावेळी राज्याचे राज्यपाल भगतसिंग कोशारी, पुण्याचे महापौर मुरलीधर मोहोळ, माजी मुख्यमंत्री देवेंद्र फडणवीस आणि शिवसेना नेते एकनाथ शिंदे उपस्थित होते.

24 डिसेंबर 2016 रोजी पंतप्रधानांच्या हस्ते या प्रकल्पाची पायाभरणी करण्यात आली होती. एकूण 32.2 किमी लांबीच्या पुणे मेट्रो रेल्वे प्रकल्पाच्या 12 किमी लांब मार्गाचे  उद्घाटन पंतप्रधान मोदींकडून करण्यात आले. हा संपूर्ण प्रकल्प 11,400 कोटी रुपयांपेक्षा जास्त खर्च करून बांधला जात आहे. मोदींनी गरवारे मेट्रो स्थानकात प्रदर्शनाचे उद्घाटन आणि पाहणी केली आणि तिथून आनंदनगर मेट्रो स्थानकापर्यंत मेट्रोने प्रवास केला.

यावेळी मोदींनी विद्यार्थ्यांशी संवाद साधला. मोदींसोबत देवेंद्र फडणवीस, राज्यपाल भगतसिंग कोशारी, शिवसेना नेते एकनाथ शिंदे यांनीही मेट्रो प्रवास केला. मोदींनी यावेळी मेट्रोची वैशिष्ट्य जाणून घेण्यासाठी अधिकाऱ्याशी संवादही साधला. दरम्यान, मेट्रो च्या उद्घाटनापूर्वी मोदींनी छत्रपती शिवाजी महाराज यांच्या पुतळ्याचे लोकार्पण केले.