पुणे- मिरज रेल्वे दुहेरीकरण भूसंपादनासाठी सातबारानुसार जमिनीची मोजणी

कराड प्रतिनिधी | सकलेन मुलाणी

पुणे- मिरज रेल्वे दुहेरीकरण भूसंपादनासाठी आज कोपर्डे हवेली येथील शेतकऱ्यांची यादववाडी हद्दीतील एकूण 10 गट नंबरची जमिनीची सयुंक्त मोजणी सातबारानुसार करण्यात आली. रेल्वेच्या हद्दीचे कोणतीही कागदपत्रे पुरावे नसल्याने शेतकऱ्यांच्या भूमिअभिलेखाकडील गटांच्या रेकॉर्डनुसार मोजणी करण्यात आली. कोपर्डे हवेली येथील अजून जवळपास 90 शेतकऱ्यांच्या जमिनी बाधित होणार आहेत. बाधित होणाऱ्या सर्व शेतकऱ्यांचा भूसंपादन प्रस्ताव रेल्वे विभागाने तयार करून त्याची सयुंक्त मोजणी करावी आणि शेतकऱ्यांना बाजारभावाच्या पाचपट मोबदला देण्यात यावा, अशी मागणी कोपर्डे हवेलीचे ग्रामस्थ व शेतकरी संघटनेच्या माध्यमातून करण्यात येत आहे.

रेल्वे दुहेरीकरणासाठी कराड तालुक्यातील रेल्वे शेजारील जमीनी प्रकल्प बाधित होत आहेत. दुहेरीकरणासाठी लागणाऱ्या जमिनीचा भूसंपादन प्रस्ताव तयार करण्यासाठी रेल्वेने खाजगी सर्व्हे कंपनीला ठेका दिला होता. सदर ठेकेदार कंपनीने शेतकऱ्यांच्या रेल्वेलगत जमिनीचा सरसकट सर्व्हे न करता काही रेल्वे शेजारील गट वगळले होते. या विरोधात शेतकरी संघटनेने आवाज उठवला होता. कोपर्डे हवेली, पार्ले, ब्रिटिश शिरवड़े, विरवड़े, टेंभू, सयापुर, हजारमाची येथील प्रस्तावातून वगळलेल्या गटांचा रेल्वे भूसंपादनात समावेश करावा, अशा मागणीचे निवेदन वेळोवेळी संघटनेने दिलेले होते.

कोपर्डे हवेली येथील सर्व रेल्वे रूळाशेजारील सर्व गटांची सयुंक्त मोजणी होवून भूसंपादन प्रस्ताव तयार झाल्याशिवाय आम्ही आमची जमीन देणार नसल्याचे निवेदन रयत क्रांति संघटनेच्यावतीने सचिन नलवडे, कोपर्डेचे जेष्ठ नेते सुदाम चव्हाण, भरत चव्हाण, मोहन चव्हाण, बाळसाहेब चव्हाण, तानाजी चव्हाण, अशोक चव्हाण यांनी दिले होते.