औरंगाबाद | जिल्हा आपत्ती व्यवस्थापन प्राधिकरण, जिल्हाधिकारी कार्यालयाने 5 एप्रिल रोजी दिलेल्या आदेशानुसार 5 मार्च ते 30 एप्रिल या कालावधीत मिशन ब्रेक द चेननुसार अन्न आस्थापनाबाबत उपाययोजनांची अंमलबजावणी अन्न व औषध प्रशासनामार्फत करण्यात येत आहे. त्यात उपहारगृहे, हॉटेल, रेस्टॉरंट, खाद्यगृह पूर्णत: बंद राहतील. मात्र पार्सल सेवा सकाळी 7 ते रात्री 8 पर्यंत सुरु राहील. खाद्यपदार्थ विक्रेत्यांना केवळ पार्सल सेवेसाठी व्यवसाय सुरु ठेवता येईल, असे अन्न व औषध प्रशासनाचे सह आयुक्त शि.बा. कोडगिरे यांनी कळविले आहे.
अन्न पदार्थांची होम डिलिव्हरी सेवा नियमितपणे सकाळी 7 ते रात्री 8 वाजेपर्यंत या वेळेत सुरु राहील. होम डिलीव्हरी देणाऱ्या कर्मचाऱ्यांचे लसीकरण चाचणी निगेटीव्ह झालेले असणे आवश्यक आहे. अटी शर्थीसह हॉटेल, रेस्टॉरंट, खाद्यगृह किराणा दुकाने सकाळी 7 ते 8 वाजेपर्यंत पार्सल सुरु ठेवता येतील. होम डिलीव्हरी व त्यासाठी स्वयंपाकगृह रात्री 8 पर्यंत सुरु ठेवण्यास मुभा असेल. सर्व औषध विक्रेत्यांना अत्यावश्यक सेवा म्हणून रात्री 8 नंतर व्यवसाय चालू ठेवण्याची मुभा दिली आहे. तथापि त्यांनी रात्री 8 वाजेनंतर केवळ औषध विक्री करावी. रात्री 8 वाजेनंतरच्या कालावधीत त्यांनी आईस्कीम, थंडपेये इत्यादी कोणत्याही अन्न पदाथार्ची विक्री करु नये.
ज्या आस्थापनांना या कालावधीत 5 मार्च 2021 ते 30 एप्रिल 2021 व्यवसाय सुरु राहण्यासाठी परवानगी देण्यात आली आहे. त्या आस्थापनांशी संबंधीत सर्व मालक, चालक, कर्मचारी, मजूर व तेथील कार्यरत सर्व व्यक्तींना कोवीड-19 च्या अनुषंगाने दर 15 दिवसांनी वारंवार तपासणी करणे बंधनकारक राहील. नजीकचा तपासणी अहवाल जवळ बाळगणे अनिवार्य असेल. तसेच कोवीड-19 च्या अनुषंगाने मास्क व सॅनिटायझरचा वापर करणे बंधनकारक असेल.
जिल्ह्यातील अन्न आस्थापनांनी 4 एप्रिल रोजीच्या आदेशानुसार 5 मार्च ते 30 एप्रिल 2021 पर्यंत काटेकोरपणे पालन करावे, या कार्यालयाने सदर कामी 3 पथके तयार केली आहेत. त्यांच्यामार्फत या आदेशाची अंमलबजावणी होते किंवा कसे याबाबत नियंत्रण ठेवण्यात येईल. उल्लंघन होत असल्याचे आढळून आल्यास संबंधितांविरुध्द कारवाई करण्यात येणार असल्याची माहिती अन्न व औषध प्रशासनाचे सहआयुक्त शि.बा. कोडगिरे यांनी दिली.
औरंगाबाद जिल्ह्यासह राज्यातील सर्व महत्वाच्या ब्रेकिंग बातम्या थेट मोबाईलवर मिळवण्यासाठी आमचा WhatsApp ग्रुप Join करा