नाशिक प्रतिनिधी | भिकन शेख
भाजप-शिवसेनेचे मनोमिनल झाले मात्र भाजपमधील पदाधिकाऱ्यांचा दुरावा, हेवेदावे, वर्चस्ववाद चव्हाट्यावर येत आहेत. जळगाव जिह्यातील भाजप पदाधिकाऱ्यांमधील वाद शमत नाही तोच नाशिकमध्येही भाजप आमदार व नगरसेवक यांच्यात प्रचारावरून खडाजंगी झाली. यामुळे भाजप नेतृत्वाची डोकेदुखी वाढली आहे. नाशिक पश्चिमच्या आमदार सीमा हिरे व नगरसेवक मुकेश शहाणे यांच्यात सुरू असलेली धुसफूस गुरुवारी ऐन प्रचारावेळी चव्हाट्यावर आली. प्रभागात प्रचाराला येऊसुद्धा नगरसेवकांना फोन केला जात नसल्याचा आरोप करून नगरसेवक शहाणे यांनी वादविवाद केला. यावेळी आमदार हिरे यांनी मध्यस्थी केल्यानंतर या दोघांमध्येच वाद होऊन खडाजंगी झाली. यामुळे एकाच पक्षाच्या आमदार आणि नगरसेवकांमध्ये समन्वय नसल्याचे चित्र समोर आले आहे.
नाशिक लोकसभा मतदारसंघातील महायुतीच्या उमेदवाराच्या प्रचारासाठी भाजप आणि शिवसेनेचे नगरसेवक, पदाधिकारी, कार्यकर्त्यांनी एकत्र प्रचार सुरू केला आहे. गुरुवारी (दि. ११) उत्तमनगर येथे महायुतीच्या उमेदवाराचा प्रचार सुरू होता. यावेळी प्रभाग २९ मधील भाजप आणि शिवसेनेचे नगरसेवक, पदाधिकारी उपस्थित होते. याचवेळी नगरसेवक शहाणे यांना याबाबत माहिती मिळाली आणि त्यांनी थेट उत्तमनगर येथील बुद्धविहार परिसरात जाऊन भाजपचे पदाधिकारी प्रकाश चकोर यांच्याकडे मला का फोन केला नाही म्हणून विचारणा केली. आमच्या प्रभागात येऊन प्रचार करताना आम्हालाच विश्वासात का घेतले जात नाही असे सुनावले. यावेळी आमदार हिरे यांनी शहाणे यांच्याशी चर्चा करण्याचा प्रयत्न केला, मात्र या चर्चेतून हा वाद विकोपाला जाऊन दोघांमध्ये खडाजंगी झाली. प्रचारानिमित्‍त दोन्ही पक्षांचे पदाधिकारी, कार्यकर्ते व नागरिकांसमोरच आमदार आणि नगरसेवक यांच्यात बाचाबाची झाली. अखेरीस काही जणांनी मध्यस्थी करून हा वाद मिटविला.
माझ्या प्रभागात प्रचार करीत असताना नगरसेवक या नात्याने पदाधिकाऱ्यांनी मला कळवायला हवे होते. मात्र मला कोणतीही माहिती देण्यात आली नाही. त्याचबरोबर मी या प्रभागाची जबाबदारी असणाऱ्या पदाधिकाऱ्याकडे विचारणा करीत होतो. त्यावेळी आमदारांनी कारण नसताना प्रकरण अंगावर ओढून घेत वादविवाद केला असा आरोप नगरसेवक मुकेश शहाणे यांनी व्यक्त केला. तर आमदार सीमा हिरे यांनी
सध्या संपूर्ण मतदारसंघात घरोघर जाऊन प्रचाराचे काम सुरळीत सुरू असल्याचं सांगत काही विरोधकांनी ही अफवा पसरवत आहेत. असा काही प्रकार घडलेलाच नाही. लोकांमधून चुकीचे गैरसमज पसरविण्याचे काम सुरू आहे. अफवा आहे असे काहीही झालेले नाही. प्रचाराबरोबरच इतरही काही बैठकांचे नियोजन सुरू आहे म्हणून वेळ मारून नेली.