हॅलो महाराष्ट्र ऑनलाइन | गेल्या काही दिवसांपासून शिवसेना आणि भाजपमधील वाद विकोपाला गेले आहेत. शिवसेना खासदार संजय राऊत हे राष्ट्रवादी कॉंग्रेसचे अध्यक्ष शरद पवार यांच्या अजेंड्यावर काम करत आहेत असे विधान भाजप प्रदेशाध्यक्ष चंद्रकांत पाटील यांनी केलं.
राष्ट्रवादीच्या खासदार आणि राष्ट्रवादीचे सर्वेसर्वा शरद पवार यांच्या कन्या सुप्रिया सुळे यांना थेट मुख्यमंत्री पदावर बसवता येणार नसल्याने संजय राऊतांना मुख्यमंत्री पदापर्यंत नेण्यासाठीचा राष्ट्रवादीचा अजेंडा असल्याचं आपल्याला वाटतं आणि तेच आपण बोलून दाखवल्याचं पुण्यामध्ये चंद्रकांत पाटील पत्रकारांच्या प्रश्नांना उत्तर देताना म्हणाले.
चंद्रकांत पाटलांनी राऊतांना ज्ञान शिकवण्याबाबत वक्तव्य केलं होतं. याबाबत पत्रकारांनी प्रश्न विचारला असता, पाटील म्हणाले की, संजय राऊतांना मी सल्ला दिलेला नाही आणि त्यांना सल्ला देण्याचं धाडस परमेश्वरही करणार नाही. मुख्यमंत्री उद्धव ठाकरे हे आमचे मित्र आहेत. तसेच अनेक वर्ष आम्ही एकत्र कामं केली आहेत. कोण संजय राऊत?, काल-पर्वा शिवसेनेत आले आणि आम्हाला शिकवत आहेत.