पुणे | लिव्ह इन पार्टनरने विवाहीत महिलेसोबतचा प्रणयाचा व्हिडीओ पाॅर्न साईटवर अपलाॅड केल्याचा धक्कादायक प्रकार पुणे येथे घडला आहे. यासंबंधी पुण्यात राहणाऱ्या विवाहित महिलेने माजी लिव्ह-इन पार्टनर विरोधात समर्थ नगर पोलीस स्टेशनमध्ये तक्रार दाखल केली आहे.
हाती आलेल्या माहितीनुसार, तक्रारदार महिला आणि आरोपी लिव्ह इन पार्टनर यांची काही वर्षांपूर्वी ओळख झाली होती. आरोपी मुळचा गोव्याचा असून तो नोकरीच्या शोधात पुण्यात आला असता त्याची तक्रारदार महिलेसोबत ओळख झाली होती. तक्रारदार महिला आणि आरोपी चार वर्ष लिव्ह इन रिलेशनशिपमध्ये राहत होते. दोघे रास्ता पेठ भागात एका फ्लॅटमध्ये रहायचे. दरम्यान दोघांमध्ये परस्पर सहमतीने शरीरसंबंध होते. एकत्र रहात असताना त्याने मोबाइल फोन वापरुन दोघांच्या लैंगिक संबंधांची क्लिप बनवली होती. काही महिन्यांपूर्वी या महिलेने दुसऱ्या पुरुषासोबत लग्न केले. त्यावेळी हा लिव्ह इन पार्टनर पुन्हा गोव्याला निघून गेला. त्याने काही दिवसांपूर्वी दोघांचा प्रणयाचा जुना व्हिडिओ सोशल मीडिया आणि पॉर्न साईटवर अपलोड केला. सदरील प्रकाराची माहिती महिलेला नातलगांकडून कळाली. तेव्हा तिने तडक समर्थ नगर पोलीस स्टेशन गाठून लिव्ह इन पार्टनर विरोधात तक्रार दाखल केली.
काही काळापूर्वी आरोपीने गोव्यामधून पॉर्न साईट आणि सोशल मीडियावर हा व्हिडिओ अपलोड केला असल्याचे पोलिस तपासातून समोर आले आहे. सोशल मीडियावर हा व्हिडिओ अपलोड करण्यासाठी आरोपीने महिलेचे बनावट अकाऊंट बनवले असल्याचेही पोलीसांनी म्हटले आहे. समर्थनगर पोलीस स्टेशन मधे आरोपी विरोधात गुन्हा दाखल करण्यात आला असून पोलीस अधिक तपास करत आहेत.