हॅलो महाराष्ट्र ऑनलाईन । लोकसभा निवडणुकीचं तिसऱ्या टप्प्यातील मतदान प्रक्रिया पार पडली असुन महाराष्ट्रातील आणखी २ टप्यांचे मतदान बाकी आहे. मात्र आत्तापासून कोण किती जागा जिंकणार? यावर नवनवीन अंदाज बांधले जात आहेत. अशातच आता राष्ट्रवादी काँग्रेस शरद पवार पक्षाचे अध्यक्ष शरद पवार (Sharad Pawar) यांनी महाविकास आघाडीला महाराष्ट्रात किती जागा मिळतील याचा आकडाच सांगितला आहे. महाराष्ट्रात महाविकास आघाडीला मोठं यश मिळेल, आम्हा सर्वांना मिळून ३० ते ३५ जागा मिळतील, असा अंदाज शरद पवार यांनी वर्तवला आहे.
कर्मवीर भाऊराव पाटील यांच्या जयंतीनिमित्त अभिवादन करण्यासाठी शरद पवार गुरूवारी साताऱ्यात आले होते. माध्यमांशी बोलताना ते म्हणाले की, राष्ट्रवादीच्या विचारांबरोबरच उद्धव ठाकरेंच्या नेतृत्वाखालील शिवसेनेला लोक समर्थन देत आहेत. आम्हाला लोकांचा पाठिंबा मिळत असल्याने यावेळी आमची संख्या ३० ते ३५ खासदारांच्या आसपास जाण्याची शक्यता आहे.
मोदींवर टीका –
शिवाजी पार्कवर होणाऱ्या पंतप्रधान मोदी आणि राज ठाकरे यांच्या सभेच्या संदर्बात शरद पवार म्हणाले की, सभेत काय होतंय ते बघुया. मोदींना कोणा- कोणाची मदत हवी आहे, हे यातून दिसते. त्यांचा आत्मविश्वास कुठं गेलाय, हेही समजतंय, अशा खोचक टोलाही पवारांनी लगावला.
अजितदादांना दिला उपरोधिक सल्ला
राष्ट्रवादी काँग्रेस पक्षात शरद पवार स्वतःच सर्व निर्णय घेतात, पण पक्षाने निर्णय घेतल्याचे दाखवतात, या अजित पवारांच्या टीकेवर शरद पवारांनी अजितदादांना उपरोधिक सल्ला दिला. त्यांनी त्यांचा पक्ष नीट चालवावा. दुसऱ्याच्या पक्षात तोंड घालू नये, असं शरद पवार म्हणाले.