खंडाळा | शिरवळ ता. खंडाळा येथे पूर्ववैमनस्यातून शनिवारी रात्री दोन गटात जोरदार राडा झाला. या राड्यात लोखंडी रॉड, लाकडी दांडक्याने मारहाण करण्यात आली असून मारामारीत पाच जण जखमी झाले आहेत. या प्रकरणी शिरवळ पोलिस ठाण्यात 15 जणांवर गुन्हा दाखल झाला आहे. मारामारी प्रकरणी पाच जणांना अटक करण्यात आली आहे.
शिरवळ येथील धीरज भाऊसाहेब माने (वय- 27) हा मित्र आकाश गुलाबराव राऊत, तेजस रसाळ याच्याबरोबर चहा पित असताना शनिवारी अनिल उर्फ पाप्या वाडेकर, स्वप्नील वाडेकर, माऊली राऊत, रोहित (सर्व रा.शिरवळ), विकास पिसाळ (रा. धनगरवाडी ता.खंडाळा), गुंजा (रा. खंडाळा), हृतिक बोलाले, साहिल चव्हाण, संकेत मोरे (सर्व रा. कराड) व इतर ३ अनोळखी युवक त्याठिकाणी आले.
त्यांनी तेजसला मारहाण करण्यास सुरूवात केली. यावेळी धीरज हा भांडणे सोडवण्यासाठी गेला असता त्यालाही रॉडने मारहाण केली. यावेळी संशयितांनी आकाशलाही मारहाण केली. ही मारहाण सुरू असताना भांडणे सोडवण्यासाठी आलेल्या दत्तात्रय आनंदराव जाधव (रा. शिरवळ) यालाही मारहाण करत जखमी केले. त्यामुळे धीरज यांच्या फिर्यादीवरून १२ जणावर गुन्हा दाखल करण्यात आला. याप्रकरणी पोलिसांनी गुंजा उर्फ गुंजन भरत भोसले, विकास आप्पाजी ढमाळ, शुभम किसन गंगावणे यांना अटक केली आहे.
याच प्रकरणात विकास पिसाळ याने परस्परविरोधी तक्रार दिली आहे. विकास हा एका बिअरशॉपीजवळ गेला असता चहा टपरीवर झालेल्या भांडणाच्या रागातून आकाश राऊत, धीरज माने, तेजस रसाळ यांनी मारहाण केली. त्यामुळे यांच्यावर गुन्हा दाखल करण्यात आला. या मारहाणी विकास हा जखमी झाला. यातील आकाश व तेजस यांना अटक करण्यात आली.