लातूर | 47 वर्षापासून संसारात साथ देणाऱ्या पतीचे हृदयविकाराच्या झटक्याने गुरुवारी सकाळी निधन झाले. हे कळताच दुःख सहन न झाल्याने अवघ्या काही वेळातच पत्नीनेही प्राण सोडला. ही हृदयद्रावक घटना (उस्तुरी ता.निलंगा) येथे घडली आहे. पती-पत्नीचा एकाच दिवशी मृत्यू झाला आणि एकाच दिवशी आई-वडिलांवर अंत्यसंस्कार करण्याची दुर्दैवी वेळ मुलांवर आली यामुळे सर्वत्र हळहळ व्यक्त होत आहे.
उस्तुरी येथील सिद्रामप्पा ईटले व ललिता ईटले यांनी शेती करुन आपला उदरनिर्वाह भागविला. सांप्रदायिक संस्कार असलेल्या या पती-पत्नीने 47 वर्षांत अनेक चढउतार अशा प्रसंगांना सामोरे जाऊन आपला सुखात संसार थाटला होता. या दांपत्याला चार मुले आहेत.
6 जून रोजी सर्वात लहान मुलाचे लग्न करून देत आपले सर्व कर्तव्य या दाम्पत्यांनी पूर्ण केले. मात्र दिनांक 15 जुलै रोजी सकाळी 8 वाजता सिद्रम्प्पा यांना हृदयविकाराचा झटका आला. आणि ते जमिनीवर पडले त्यातच त्यांचा मृत्यू झाला. आपल्या पतीचे मृत्यू झाल्याचे समजताच ललिताबाई यांना हृदयविकाराचा झटका आला आणि त्यांनी ही शेवटचा श्वास घेतला.