हॅलो महाराष्ट्र ऑनलाईन। (Shweta Shinde) मराठी अभिनय विश्वातील लोकप्रिय अभिनेत्री आणि निर्माती श्वेता शिंदे कायम चर्चेत असते. कधी आगामी मालिका तर कधी वैयक्तिक आयुष्यामुळे त्यांच्याविषयी चर्चा रंगते. दरम्यान, श्वेता शिंदे यांच्याविषयी एक मोठी बातमी समोर आली आहे. मिळालेल्या माहितीनुसार, अभिनेत्री श्वेता शिंदे यांच्या साताऱ्यातील घरात चोरी झाली आहे. सदर घटना दिनांक ३ जून २०२४ रोजी घडली असून घरफोडीमध्ये काही तोळे सोनं आणि पैसे चोरी झाल्याची माहिती मिळत आहे.
अभिनेत्रीच्या साताऱ्यातील घरात चोरी (Shweta Shinde)
मराठी मनोरंजनविश्वात स्वबळावर नावलौकिक मिळवणारी अभिनेत्री श्वेता शिंदे ही मूळची साताऱ्याची आहे. गेल्या काही काळात केवळ अभिनय नव्हे तर निर्मिती विश्वात देखील श्वेता शिंदे झळकली आहे. आताच्या घडीला बऱ्याच आघाडीच्या मालिकांची निर्मिती श्वेता शिंदेने केली आहे. साताऱ्यात काही मालिकांचे शूटिंग देखील सुरु आहे. अशातच त्यांच्या साताऱ्यातील घरावर दरोडा पडल्याचे समोर आले आहे. काही चोरांनी श्वेताच्या घरात चोरी करून तिच्या घरातून तब्बल १० तोळे सोनं आणि काही रोख रक्कम चोरी केल्याची माहिती समोर आली आहे. या प्रकरणी अभिनेत्रीने पोलिसात तक्रार दाखल केली असून तपास सुरु आहे.
पोलिसांत केली तक्रार
अभिनेत्री श्वेता शिंदे ही साताऱ्यात पिरवाडी येथील घरी आपल्या आईसोबत राहते. ज्या दिवशी घरफोडी झाली त्यादिवशी काही कामानिमित्त श्वेता मुंबईत आली होती आणि तिची आईदेखील घरात नव्हती. (Shweta Shinde) त्यामुळे घरात कुणी नाही याची संधी साधून चोरांनी तिच्या घरावर दरोडा टाकला. या प्रकरणी अभिनेत्री श्वेता शिंदेने सातारा पोलीस ठाण्यात तक्रार दाखल केली आहे. या तक्रारीत तिने आईच्या लक्षात असल्याप्रमाणे, घरातून १० तोळे सोने आणि काही रक्कम चोरी झाल्याचे नमूद केले आहे. अजूनही किती मालमत्ता चोरी झाली हे नक्की सांगता येणार नाही, असेही म्हटले आहे. अभिनेत्रीची तक्रार दाखल केल्यानंतर पोलीस या प्रकरणाबाबत तपास करत असल्याचे समजत आहे.
श्वेता शिंदेची कारकीर्द
अभिनेत्री श्वेता शिंदे ही मराठी कलाविश्वात लोकप्रिय अभिनेत्री आहे. तिने आतापर्यंत अनेक मराठी चित्रपट तसेच मालिकांमध्ये काम केले आहे. अभिनयासोबत तिने निर्मिती क्षेत्रात देखील चांगला जम बसवला आहे. (Shweta Shinde) झी मराठीच्या ‘लागीर झालं जी’, ‘अप्पी आमची कलेक्टर’ अशा मालिकांची निर्माती म्हणून तिने काम पाहिले आहे.
यानंतर आता श्वेताची ‘लाखात एक आमचा दादा’ ही नवी मालिका देखील लवकरच सुरु होते आहे. या मालिकेचे प्रोमो सध्या सोशल मीडियावर सर्वांचे लक्ष वेधून घेत आहेत.