सातारा प्रतिनिधी | शुभम बोडके
पळसावडे (ता. सातारा) येथे गर्भवती वनरक्षक महिलेला व तिच्या पतीला झालेल्या मारहाणी बाबत पूर्ण तपास करून मुली, महिलेला मारहाण करणाऱ्यांना कडक शिक्षा करा अशी मागणी बेटी बचाओ बेटी पढाओ भाजपा महाराष्ट्र प्रदेश संयोजक डॉ. सौ. शुभा फरांदे-पाध्ये यांनी पोलीस अधीक्षक सातारा यांच्याकडे निवेदनाद्वारे केली.
यावेळी बेटी बचाओ, बेटी पढाओ आघाडी प्रदेश कार्यकारिणी सदस्य मनीषा पांडे, बेटी बचाओ बेटी पढाओ सातारा जिल्हाध्यक्ष अश्विनी हुबळीकर, शहराध्यक्ष विकासजी गोसावी, जिल्हा सरचिटणीस विठ्ठलजी बलशेटवार,
ओबीसी मोर्चा उपाध्यक्ष सातारा संध्या निकुंभ, ,ओबीसी युवती जिल्हाध्यक्ष वनिता पवार, बेटी बचाओ बेटी पढाओ फलटण समन्वयक किरण जाधव, रीना भणगे, ऍड जागृती ससाणे, मनीषा जाधव, युवा मोर्चा सातारा शहराध्यक्ष विक्रम बोराटे व प्रमुख पदाधिकारी उपस्थित होते.
निवेदनात लिहिले आहे की, पळसावडे (ता. सातारा) येथे गर्भवती वनरक्षक असलेल्या सिंधू बाजीराव सानप या महिलेला व तिच्या पतीला, माजी सरपंच रामचंद्र गंगाराम जानकर व प्रतिभा जानकर (दोघेही रा. पळसावडे) तसेच त्याच्या पत्नीने मारहाण केल्याची धक्कादायक घटना घडली. दि. 17 रोजी सकाळी नऊ वाजता पळसावडे येथे आरोपी प्रतिभा जानकर हिने तक्रारदार सिंधू सानप यांना ‘तू कामावरील बायका का घेऊन गेलीस, असे म्हणत थोबाडीत मारत वाद घातला होता. यानंतर दि. 18 रोजी दुपारी पुन्हा संशयित महिलेने फोन करून ‘तू वनक्षेत्रात यायचे नाही. आलीस तर मारेन,’ असे म्हणत दमदाटी, शिवीगाळ केली. दि. 19 रोजी सकाळी 8 वाजता तक्रारदार व त्यांचे वनरक्षक पती काम करत असताना तेथे संशयित आरोपी पती व पत्नी आले. संशयितांनी पुन्हा वाद घालत थेट तक्रारदार व त्यांच्या पतीला मारहाण करण्यास सुरुवात केली. तक्रारदार या गर्भवती असतानाही त्यांना मारहाण करण्यास सुरुवात झाल्याने त्यांच्या जीवितास धोका निर्माण झाला आहे. सदर आरोपी हा वनसंरक्षक समितीमधील समन्वयक असून त्याने केलेले सदर कृत्य अत्यंत घृणास्पद व निंदनीय आहे. सदर आरोपी यांनी दगडाने मारहाण करत जीवे मारण्याची धमकी यावेळी दिली.
या घटनेमुळे संतापाची लाट निर्माण झाली असून, सातारा तालुका पोलिस ठाण्यात मारकुट्या दाम्पत्यावर गुन्हा दाखल झाला आहे. तरी सदर पोलीस तपासाच्या कामी शासकीय सेवा बजावत असणाऱ्या कर्मचाऱ्यावर झालेल्या प्राणघातक हल्ल्याच्या अनुषंगाने जीवे मारण्याचा प्रयत्न. स्त्री गर्भातील अर्भकाचे जीवितास धोका निर्माण होईल वगैरे विषयाच्या अनुषंगाने गंभीर गुन्हा घडलेला आहे. तरी सदर गुन्हयाचे कामी भारतीय दंड संहिता कलम ३०७, ३५३, ३५४ए, ३४ व अन्य आवश्यक कलमांच्या अन्वये गुन्हा दाखल होवून सदर आरोपीस कडक शासन व्हावे, अशी मागणी निवेदनात केली आहे.