काबूल ।अफगाणिस्तानची राजधानी काबूल ताब्यात घेतल्यानंतर तालिबानने आपल्या सरकारची घोषणा केली आहे. तालिबानचे मुख्य प्रवक्ते जबीउल्लाह मुजाहिद यांनी मंगळवारी पत्रकार परिषदेत ही माहिती दिली. यासोबतच तालिबानने अफगाणिस्तानबाबतची आपली आगामी धोरणेही सांगितली आहेत. तालिबानने पुन्हा स्पष्ट केले आहे की, अफगाणिस्तानमध्ये सरकार फक्त शरिया कायद्यानुसार चालणार आहे.
जबीउल्लाह मुजाहिद यांनी लोकांना अफगाणिस्तान सोडू नये असे आवाहन केले. इस्लामिक देशाला कोणाशीही समस्या नाही, परदेशी देशांनीही अफगाणिस्तानात आपले दूतावास पुन्हा सुरू करावेत.
आपल्या नवीन धोरणाची घोषणा करताना तालिबानने म्हटले आहे की,”भविष्याची कोणीही चिंता करू नये, आमचा पहिला प्रयत्न देशाच्या समस्या कायदेशीररित्या सोडवण्याचा आहे.” तालिबानने म्हटले आहे की,” गेल्या दोन दशकांपासून आपण जो संघर्ष केला आहे त्याची केवळ दोन उद्दिष्टे होती. सर्वांत आधी, परकीय शक्तींना देशाबाहेर हाकलणे आणि नंतर स्वतःची इस्लामी व्यवस्था लागू करणे.”
तालिबानचे मुख्य प्रवक्ते जबीउल्लाह मुजाहिद म्हणाले की,”या अंतर्गत भविष्यात अफगाणिस्तानमधील सरकार आणि सामान्य लोकांचे जीवन शरिया कायद्यानुसार चालवले जाईल.” या तालिबानी प्रवक्त्याने पुढे सांगितले की,”नवीन सरकारचा प्रयत्न अफगाणिस्तानात शांतता प्रस्थापित करण्याचा आहे आणि वातावरणात आणखी सुधारणा होईल.”
तालिबान सरकारमध्ये मुल्ला मोहम्मद हसन अखुंद याला पंतप्रधान करण्यात आले आहे. मुल्ला बरादार आणि मुल्ला अब्दुल सलाम हनाफी यांना त्याच्यासोबत उपपंतप्रधान बनवण्यात आले आहे. तालिबान प्रमुख शेख हैबदुल्ला अखुंदजादाला सुप्रीम लीडर बनवण्यात आले आहे. त्याला अमीर-उल-अफगाणिस्तान असे म्हटले जाईल.