नवीन आर्थिक वर्षापासून वाहनांचा थर्ड पार्टी इन्शुरन्स महागणार

नवी दिल्ली । वाहनधारकांच्या खिशावरचा भार पुन्हा एकदा वाढणार आहे. सरकार नवीन आर्थिक वर्षापासून वाहनांचा थर्ड पार्टी इन्शुरन्स महाग करणार आहे. आता वाहनधारकांना थर्ड पार्टी इन्शुरन्ससाठी 17 ते 23 टक्के जास्त रक्कम भरावी लागणार आहे. काही काळापूर्वी, रस्ते वाहतूक मंत्रालयाने इन्शुरन्स रेग्युलेटर IRDAI सोबत सल्लामसलत करून आर्थिक वर्ष 202-23 साठी थर्ड पार्टी मोटर इन्शुरन्सचे दर प्रस्तावित केले होते.

सर्व प्रकारच्या वाहनांसाठी थर्ड पार्टी इन्शुरन्स अनिवार्य करणे बंधनकारक आहे. वाहनाच्या इंजिन क्षमतेच्या आधारावर इन्शुरन्सचे दर ठरवले जातात आणि ते वेगवेगळे असतात. सर्वोच्च न्यायालयाच्या आदेशानंतर, सप्टेंबर 2018 पासून विकल्या गेलेल्या प्रत्येक चारचाकीसाठी 3 वर्षांचा थर्ड पार्टी इन्शुरन्स आणि सप्टेंबर 2018 पासून दुचाकीसाठी 5 वर्षांचा थर्ड पार्टी इन्शुरन्स वाहन विक्रीच्या वेळी असणे बंधनकारक झाले आहे.

असे असतील इन्शुरन्सचे नवीन दर
1 एप्रिल 2022 पासून, 1500 सीसी पर्यंतचे वाहन खरेदी करणाऱ्यांना 1200 रुपयांपर्यंतचा जास्त थर्ड पार्टी इन्शुरन्स भरावा लागेल. त्याचप्रमाणे 150 सीसीपर्यंतच्या दुचाकीसाठी ग्राहकाला 600 रुपये जास्त मोजावे लागतील. त्याच वेळी, आधी खरेदी केलेल्या खाजगी कारचा थर्ड पार्टी इन्शुरन्स त्यांच्या इंजिन क्षमतेनुसार ₹ 7-195 ने वाढेल. त्याचबरोबर दुचाकींचा इन्शुरन्सही 58 रुपयांवरून 481 रुपयांपर्यंत महागणार आहे.

गेल्या वर्षी 1000 सीसी कारचा थर्ड पार्टी इन्शुरन्स प्रीमियम 2072 रुपये होता, जो वाढल्यानंतर 2094 रुपये होईल. तसेच 1000 ते 1500 सीसी वाहनांच्या थर्ड पार्टी इन्शुरन्ससाठी आता 3221 रुपयांऐवजी 3416 रुपये मोजावे लागणार आहेत. दुचाकी चालकांनाही महागाईचा फटका बसणार आहे. आता 150 सीसी ते 350 सीसीच्या दुचाकींसाठी 1,366 रुपये प्रीमियम भरावा लागणार आहे. 350 सीसी वरील वाहनांसाठी प्रीमियम दर आता वार्षिक 2,804 रुपये असेल.

10-15 टक्के वाढ करण्याचा प्रस्ताव होता
इन्शुरन्स कंपन्यांनी 1 एप्रिल 2020 पासून मोटर थर्ड पार्टी इन्शुरन्सच्या दरांमध्ये 10-15% वाढ सुचवली होती मात्र कोरोनामुळे IRDAI ने थर्ड पार्टी मोटर इन्शुरन्समध्ये बदल केला नाही. थर्ड पार्टी इन्शुरन्स जून 2019 मध्ये शेवटचा बदलण्यात आला होता.