Tuesday, February 7, 2023

‘मातोश्री’च्या दारावर कोरोनाची पुन्हा धडक! तैनात असलेले ३ पोलीस कोरोनाग्रस्त

- Advertisement -

मुंबई । मातोश्री या मुख्यमंत्री उद्धव ठाकरे यांच्या निवासस्थानावर पुन्हा एकदा कोरोनाने धडक दिली आहे. मातोश्रीबाहेर बंदोबस्तासाठी तैनात असलेल्या ३ पोलिसांना कोरोनाची लागण झाल्याची धक्कादायक माहिती समोर आली आहे. हे पोलीस कर्मचारी मागील काही दिवसांपासून इथे कार्यरत आहेत. याआधी मातोश्री परिसरातल्या चहावाल्याला करोनाची लागण झाली होती.

दरम्यान करोना पॉझिटिव्ह आढळलेल्या या ३ पोलिसांवर उपचार करण्यात येत आहेत. पॉझिटिव्ह आढळलेल्या या पोलिसांमध्ये कोणतीही लक्षणं दिसून येत नव्हती. त्यामुळे खबरदारीचा उपाय म्हणून कला नगर भागातील सगळ्या पोलिसांनी पुन्हा एकदा करोना चाचणी करण्यात येते आहे. याआधी करण्यात आलेल्या टेस्टमध्ये सगळ्या पोलिसांची करोना टेस्ट निगेटिव्ह आली होती.

- Advertisement -

याआधी २२ एप्रिलला मुख्यमंत्री उद्धव ठाकरे यांच्या वर्षा या बंगल्यावर तैनात असलेल्या एका सहाय्यक पोलीस निरीक्षकालाही कोरोनाची लागण झाल्याचं वृत्त समोर आलं होतं. त्यावेळी या सहाय्यक निरीक्षकाच्या संपर्कात असलेल्या ६ जणांना क्वारंटाइन करण्यात आलं होतं. तर वर्षा बंगल्यावर तैनात असलेल्या एका महिला कॉन्स्टेबलचाही करोना रिपोर्ट पॉझिटिव्ह आला होता. यानंतर आता मातोश्रीबाहेर तैनात असलेल्या ३ पोलिसांना करोनाची लागण झाल्याचं वृत्त आहे.

दरम्यान मुंबईत शुक्रवारी करोनाग्रस्तांची संख्या ७ हजार ६०० च्या पुढे गेली आहे. तर आत्तापर्यंत एकट्या मुंबईत २९५ जणांचा मृत्यू झाला आहे. त्यामुळे सर्वतोपरी काळजी घेण्यात येते आहे. सोशल डिस्टन्सिंग, करोना प्रतिबंधित क्षेत्र, करोनाशी संबंधित चाचण्या वाढवणं हे सगळं केलं जातं आहे. तरीही करोनाचे रुग्ण वाढत आहेत. यावर सरकार आणि मुंबई महापालिका सर्वतोपरी उपाय योजण्याचे प्रयत्न करते आहे.

ब्रेकिंग बातम्या मोबाईलवर मिळवण्यासाठी आम्हाला 7972630753 या नंबरला WhatsApp करा आणि लिहा “Hello News.”