नवी दिल्ली । आजपासून नवीन वर्षाला (New year 2021) सुरुवात झाली आहे. गेल्या वर्षीच्या कोरोनाच्या कटू आठवणींना मागे टाकत देशभरात उत्साहाचे वातावरण आहे. या नववर्षात काही नवीन नियमही लागू होणार आहेत. त्यामुळे सामान्य लोकांवरील आर्थिक बोजा वाढणार आहे. नव्या नियमांमुळे दैनंदिन वापरातील टीव्ही, बाईकपासून कारपर्यंत अनेक गोष्टी महाग होणार आहेत. परिणामी तुमचे आर्थिक बजेट कोलमडण्याची शक्यता आहे.
कार आणि बाईक महागणार
यंदा तुम्ही कार किंवा बाईक खरेदी करणार असाल तर तुम्हाला जास्त पैसे मोजावे लागणार आहेत. स्टील, अ‍ॅल्युमिनियम आणि प्लॅस्टिकचे दर वाढल्याने कार आणि बाईक्सचा उत्पादन खर्च वाढला आहे. त्यामुळे चारचाकी वाहनांच्या किंमतीमध्ये पाच टक्क्यांची वाढ होण्याची शक्यता आहे. भारतातील सर्वात मोठी वाहनिर्मिती कंपनी असलेल्या मारुती सुझुकीने आपल्या 12 कार मॉडेल्सच्या किंमतीत दरवाढ जाहीर केली आहे. त्यामुळे मारुती सुझुकीच्या मॉडेल्सची किंमत 5 हजार ते 35 हजारापर्यंत वाढू शकते. (car bike and home appliances price will be increase in New year 2021)
टीव्ही आणि फ्रीज महागणार
नव्या वर्षात एलईडी टीवी, फ्रिज, वॉशिंग मशीन आणि घरगुती उत्पादनांच्या किंमतीत वाढ होणार आहे. या उत्पादनांची किंमत 10 ते 12 टक्क्यांनी वाढू शकते. तांबे, स्टील आणि अ‍ॅल्युमिनियम या धातुंची किंमत वाढल्याने ही दरवाढ होणार असल्याचे सांगितले जाते.
याशिवाय, जलवाहतूक आणि हवाई वाहतुकीचेही दर वाढणार आहेत. टीव्ही संचांच्या पॅनल्सची किंमत 200 टक्क्यांनी वाढणार आहे. तर क्रूड ऑईलमधील तेजीमुळे प्लॅस्टिकचा भाव वधारणार आहे. त्यामुळे जानेवारी महिन्यात पॅनासॉनिक इंडिया, एलजी आणि थॉमसन या कंपन्यांनी आपल्या उत्पादनांच्या किंमती वाढवण्याचे जाहीर केले आहे. तर सोनी कंपनीकडूनही उत्पादनांच्या दरवाढीचे संकेत देण्यात आले आहेत.
गाड्यांवर FASTAG बंधनकारक
यंदाच्या वर्षात गाड्यांवर फास्टटॅग लावणे बंधनकारक करण्यात आले आहे. PayTM, Amazon, Snapdeal सारख्या ऑनलाईन प्लॅटफॉर्मवरुन त्याची खरेदी करता येऊ शकते. त्याचबरोबर देशातील 25 बँकांच्या माध्यमातूनही फास्टटॅगची खरेदी केली जाऊ शकते.
ब्रेकिंग बातम्या मोबाईलवर मिळवण्यासाठी आम्हाला 7972630753 या नंबरला whatsapp करा आणि लिहा ‘Hello News’