औरंगाबाद – जिल्ह्यातील वैजापूर तालुक्यातील बिलोनी या गावात दोन गटात तुंबळ हाणामारी झाल्याची धक्कादायक घटना उघडकीस आली आहे. शेत जमिनीच्या वादातून हे दोन गट आपसात भिडले आहेत. यावेळी दोन्ही गटांनी लाठ्या-काठ्या तसेच शेतातील दगडाने एकमेकास मारहाण केली आहे. कुटुंबातील एका सदस्याने या घटनेचा व्हिडीओ आपल्या मोबाइलमध्ये शूट केला आहे. हा व्हिडीओ सध्या सोशल मीडियात वेगानं व्हायरल होतं आहे.
औरंगाबादेत दोन गट आपसात भिडले; वृद्धाला काठीने अमानुष मारहाण, भयावह घटनेचा LIVE VIDEO pic.twitter.com/lwRBCWQcrf
— The मराठी Medium (@MarathiMedium) February 5, 2022
या प्रकरणी दोन्ही गटांनी परस्पर विरोधात शिवुर पोलीस ठाण्यात फिर्याद दाखल केली आहे. पोलिसांनी विविध कलमाअंतर्गत दोन्ही गटांविरोधात गुन्हा दाखल केला असून व्हिडीओच्या आधारे तपास केला जात आहे. पोलिसांनी दिलेल्या माहितीनुसार, वैजापूर तालुक्यातील बिलोनी येथील रहिवासी असणाऱ्या या दोन गटात मागील काही दिवसांपासून शेतीचा वाद सुरू होता. याच वादातून ही हाणामारी झाली आहे.
या मारहाणीत जखमी झालेल्यांवर घाटी रुग्णालयात उपचार केले जात आहे. मारहाणीची ही घटना घडताच परिसरात तणावाचं वातावरण निर्माण झालं आहे. हा वाद आणखी वाढू नये, यासाठी गावात काटेकोर पोलीस बंदोबस्त ठेवण्यात आला आहे. या प्रकरणी पोलीस प्रत्यक्षदर्शी, व्हायरल व्हिडीओ आणि दोन्ही गटातील फिर्यादींच्या जबाबावरून तपास करत आहेत.