शाहजहापूर । उत्तर प्रदेशमधून बलात्काराच्या धक्कादायक घटना नेहमी कानावर पडतात. अशीच एक धक्कादायक घटना यूपीतील शाहजहांपूर जिल्ह्यात घडली आहे. पोलीस स्टेशनमध्ये सामूहिक बलात्काराची तक्रार नोंदवण्यासाठी गेलेल्या महिलेनं एका पोलिस अधिकाऱ्याने आपल्यावर पुन्हा बलात्कार केल्याचा आरोप केलाय. वरिष्ठ पोलीस महासंचालकांच्या आदेशानंतर या प्रकरणाची चौकशी सुरू करण्यात आलीय. महिलेच्या आरोपांत तथ्य आढळलं तर गुन्हा नोंदवण्यासोबतच दोषी पोलीस कर्मचाऱ्यावरही कठोर कारवाई करण्यात येईल, असं अधिकाऱ्यांनी म्हटलंय.
पोलीस अधिकारी ब्रह्मपाल सिंह यांनी दिलेल्या माहितीनुसार, जलालाबादची रहिवासी असलेल्या एका ३५ वर्षीय महिलेकडून पोलीस कर्मचाऱ्यावर बलात्काराचा आरोप करण्यात आलाय. ३० नोव्हेंबर रोजी मदनपूरकडे निघालेली असताना तिची रिक्षा अचानक बंद पडली. त्यामुळे ती पायीच मदनपूरकडे निघाली होती. यावेळी, पाठीमागून कारमधून आलेल्या चार जणांनी तिला घेरलं आणि बाजूच्याच शेतात नेऊन तिच्यावर सामूहिक बलात्कार केला, अशी या महिलेची तक्रार होती.
महिलेनं केलेल्या दाव्यानुसार, सामूहिक बलात्काराची तक्रार नोंदवण्यासाठी ती जलालाबाद पोलीस स्टेशनला दाखल झाली असता तिथे उपस्थित असणाऱ्या विनोद कुमार या पोलीस अधिकाऱ्यानं तिच्यावर बलात्कार केला. यानंतर महिलेनं बरेली क्षेत्रातील वरिष्ठ पोलीस महासंचालक अविनाश चंद्र यांना गाठलं आणि आपली कैफीयत त्यांच्यासमोर मांडली. या कथित बलात्कार प्रकरणानं अविनाश चंद्र यांनाही धक्का बसला. वरिष्ठ पोलीस महासंचालकांच्या आदेशानंतर या प्रकरणाची खोलात चौकशी सुरू करण्यात आलीय. आपण स्वत: या प्रकरणात लक्ष घालून असल्याचं अविनाश चंद्र यांनी सांगितलंय.
बातम्या मोबाईलवर मिळवण्यासाठी आम्हाला 7972630753 या नंबरला whatsapp करा आणि लिहा ‘Hello News’