हॅलो महाराष्ट्र ऑनलाईन : पिण्याच्या पाण्याच्या टँकरमध्ये महिलेचा मृतदेह (Pune Water Tanker) आढळल्याची धक्कादायक आणि खळबळजनक घटना पुणे जिल्ह्यातील फुरसुंगी येथे समोर येत आहे. फुरसुंगी येथील पॉवर हाऊसजवळ पाणी सोडत असताना हा प्रकार समोर आला आहे. या घटनेची माहिती मिळताच कोंढवा पोलिसांनी घटनास्थळी धाव घेत तपास सुरू केला आहे. हा खून आहे कि आत्महत्या आहे हे अजून समोर आलेलं नाही. परंतु अशा विचित्र घटनेनं संपूर्ण परिसरात मोठी खळबळ उडाली आहे.
पोलिसांनी दिलेल्या माहितीनूसार, सकाळी कोंढवा येथून एक टँकर पाणी भरण्यासाठी हांडेवाडी येथील पॉवर हाऊसला आला होता. टँकरमध्ये पाणी भरताना मध्येच ते पाणी अडले गेले. यामुळे टँकर चालकाने खाली उतरुण बघितले तर त्याला टँकरमध्ये महिलेचा मृतदेह दिसला. यानंतर टँकरचालकाने तातडीने हडपसर पोलीस ठाण्यात याबाबत माहिती दिली. हडपसर पोलीस घटनास्थळी दाखल झाले. हा टँकर कोंढव्यावरुन आल्याने हडपसर पोलिसांनी कोंढवा पोलिसांनी ही खबर दिली. कोंढवा पोलिसांनी महिलेची ओळख पटवली. यानंतर तिचा मृतदेह शवविच्छेदनासाठी ससून रुग्णालयात पाठवण्यात आला.
कौशल्या मुकेश चव्हाण असं सदर मृत महिलेचं नाव आहे. कोंढवा पोलीस ठाण्यात हि महिला हरवल्याची तक्रार यापूर्वीच दाखल करण्यात आली होती. पोलिस या महिलेचा शोध घेत होते. मात्र आता तिचा मृतदेह पाण्याच्या टँकरमध्ये सापडल्याने खळबळ उडाली आहे. तसेच याबाबत वेगवेगळे संशय व्यक्त केले जात आहेत. या महिलेची हत्या करण्यात आली आहे कि तिने स्वतःच आत्महत्या केली याचा तपास पोलीस करत आहेत.