हॅलो महाराष्ट्र ऑनलाईन । साताऱ्यातून एक धक्कादायक बातमी समोर येत आहे. भाजप नेते आणि माण- खटावचे आमदार जयकुमार गोरे (Jaykumar Gore) यांच्या ताफ्यातील गाडीने एका दुचाकीला उडवलं. या अपघातात (Satara Accident) दुचाकीवरील दोनही व्यक्तींचा दुर्दैवी मृत्यू झाला आहे. निकेत नितीन मगर (वय २६ ) व रणजित राजेंद्र मगर (वय ३२, रा. शेरेवाडी, ता. माण) अशी मृत तरुणांची नावे आहेत. हे दोघेही बिदाल शेरेवाडी गावचे रहिवासी आहेत.
याबाबत अधिक माहिती अशी कि, शनिवारी सकाळी आमदार गोरे हे आपल्या ताफ्यासह जनसंवाद दौऱ्यासाठी बोराटवाडी येथील आपल्या निवासस्थानातून बाहेर पडले. त्यांच्या ताफ्यातील सर्व वाहने भरधाव वेगात निघाली होती. याच सुमारास बिदाल व दहिवडी दरम्यान असलेल्या शेरेवाडी येथील अनिकेत मगर व रणजित मगर हे आपल्या दुचाकीवरून बिदालकडे निघाले होते. त्याच दरम्यान जयकुमार गोरे यांच्या ताफ्यातील एका कारने त्यांचा दुचाकीला उडवलं. हि धडक इतकी भीषण होती कि कार आणि दुचाकींचा अक्षरशः चक्काचूर झाला आणि दोन्ही तरुण हवेत उडून पडले. तसेच स्कॉर्पिओ रस्ता सोडून बाजूला गेली. यात स्कॉर्पिओचे सुध्दा मोठे नुकसान झाले
या भीषण अपघातानंतर दोन्ही दुचाकीस्वारांना तातडीने उपचारासाठी दहिवडीतील ग्रामीण रुग्णालयात हलविण्यात आले. मात्र उपचारापूर्वीच दोघांचा मृत्यू झाला होता. या घटनेमुळे बिदाल-शेरेवाडी गावावर शोककळा पसरली आहे. हा अपघात नेमका कसा झाला? यात चूक कोणाची होती हे अद्याप समोर आलेलं नाही.